Pasiuna
Usa ka himambayeng politiko ang namatay human siya mapusili sa kaatbang niya sa politika. Sa dihang nahiabot ang iyang kalag didto sa langit, gisugat dayon siya sa usa ka anghel ug pugsanong gibitad aron itambog na unta sa impiyerno. Apan nagtiyabaw nga nangaliyupo ang maong politiko ngadto sa anghel nga unta hatagan pa siya’g tsansa bisan na lang sa katapusang higayon. Ang anghel tungod kay naluoy miingon: “Murag lisod nang imong hangyo da, apan sagdi lang.Hatagan ko ikaw og balig tulo ka minuto nga mobalik sa imong lawas apan sa usa ka kondisyon.” Ang politiko malipayon nga nangutana: “Unsa man akong buhaton talahurong anghel?” Ang anghel mitubag: “Nga sulod sa maong mga gutlo moingon ka og: “Jesus pasayloa ako! Kay kundili na nimo masulti, impiyerno ka pre!” Ang politiko mapasaligon kaayo nga iyang tumanon ang maong kondisyon. Tuod man nabuhi siya sulod sa tulo ka minuto ug sa pagbuka niya sa iyang mga mata, nakita niya nga gwapa ug seksi kaayo ang nars nga miatiman kaniya. Iya kining giingnan: “Miss, available ka if ever I’ll invite you for dinner?” Dayon kidhat sa bilyako niyang mga mata.
Pagpalawom
Nisulod na usab kita sa bag-ong tuig sa kalendaryong liturhiko sa Simbahan, ang Adbiyento. Ang Adbiyento gikan sa linatin nga pulong nga Adventus nga nagkahulogan og Pag-abot. Diin atong gihandum ang Unang Pag-abot sa atong Ginoo diha sa iyang Pagkahimugso ingon nga tawo ug atong gipaabot pa uban ang paglaom ang Ikaduha niyang Pag-abot kon Parousia. Ang Adbiyento ang nagdapit kanato nga mamahimong magmaigmaton nga dili unta kita masilaw sa bisan unsang aksidental nga mga butang hinunoa, hinloan nato ang atong hunahuna ug kasingkasing aron makahatag kita og tukmang atensiyon sa mahinungdanong hitabo sa kasaysayang tawhanon nga mao ang pagsulod sa Dios diha mismo sa atong kasaysayan. Dili nato usikan ang kahigayonan nga gihatag sa Dios kanato dili sama sa maong politiko nga bisan himatyon ang nagpabilin gihapong nahilansang sa walay hinungdang pagpamiga.
Implikasyon niini sa atong inadlaw ug Kristohanong pagkinabuhi
Kun ang tawo personal nga mihukom nga dili gyud siya magbag-o, kawang lamang ang Diosnong grasya. Kay bisan kita gibalaan sa Dios, apan wala kini magpasabot ug pagpasagad lamang sa bisan unsa nga kanato gihatag. Mao unta ni ang atong hinuklogan nga bisan nagtinga na kita ang Dios dili buot sa kamatayon sa usa ka makasasala. Mao ang panahon sa Adbiyento maoy panahon usab sa paghimo og mga recollections agi’g pagpangandam sa pagsugat sa Mesiyas nga Nagpakatawo.