Sa Lifestyle Section ng Philippine STAR
Ay aming nabasa malungkot na buhay –
Ng butihing anak na biglang nawalay
Dinala ng Diyos sa kaitaasan!
Kinapos sa anghel ang Diyos sa langit
Kaya si Natasha dalagang mabait --
Ay Kanyang kinuhang bigla sa daigdig
Nag-iwan ng sugat na lubhang masakit!
Kay gandang diwata ang nasa larawan
Kaya puso nami’y sinakmal ng lumbay;
pumasok sa diwa ang panghihinayang
Sapagka’t ang anak ay biglang naparam!
Sinulat ng ina ay napakalungkot
Dahil sa ang hapis sa puso’y sumaklot
At pati na kami sa malayong pook
Ay nakaramdan din ng paghihimutok!
Maganda’t mabait anak na nawalay
Na sa ama’t ina’y lubhang napamahal;
Pati ang kapatid na biglang naiwan
Nag-iisa ngayon kapag nalulumbay!
Ikaw Jean at kami at ang iyong mister
Malayo ang agwat pero magkapatid;
Kaya sa dusa n’yo kami’y nahahapis
Sapagka’t naglaho’y bituing marikit!
Kung si Tasha ngayon ay buhay pa
Ang magandang buhay tiyak nasa kanya;
‘di salat sa buhay ang kanyang pamilya
Maligaya siya saan man mapunta!
Pahirin ang luha – tibayan ang dibdib
Umalis man siya siya’y nasa langit;
Siya’y isang anghel na sa bawa’t saglit
Ay kasama n’yo rin saan man sumapit!
Karamay n’yo kami sa inyong pagluha
At ang tulang ito ay isang kandila –
Bawa’t tulo nito ay taghoy ng diwa –
Na alay kay Tasha na awit at tula!