Sugdan na sa departamento sa edukasyon ang pagpatuman sa dugang duha ka tuig sa napulo ka tuig nang daang basic education sa nasud. Ang dugang duha ka tuig sa basic education mao ang tubag sa kagamhanang Noynoy Aquino sa suliran sa pag-ubos sa kalidad sa edukasyon sa nasud.
Gawas sa pagpataas sa kalidad sa edukasyon ang dugang duha ka tuig igahin usab sa mga tinun-an alang sa pagkat-on sa agrikultura, fisheries ug ubang technical skills nga makatabang unya sa ilang panginabuhian.
Makapataas gyod kaha sa kalidad sa edukasyon ang dugang duha ka tuig sa basic education sa nasud? Dili kaha hinoon ang naghalhal nang dila sa mga ginikanan ang motaas gumikan kay nagbagood na kini sa kabug-at ug ka mahal na sa pagpaedukar sa ilang mga anak?
Ang sulbad sa suliran nga nahuna-hunaan sa kagamhanang Aquino taphaw ug laki-laki lamang. Ang maong sulbad nagmugna usab hinoon ug dugang suliran sa kalidad sa edukasyon. Di ko motoo nga ang mga educator nga nagpaluyo sa kagamhanang Aquino wa masayod sa tinuoray nga hinungdan sa pag-ubos sa kalidad sa edukasyon sa nasud.
Sayod ka, sayod kamo ug nasayod kitang tanan nga ang hinungdan sa pag-ubos sa kalidad sa edukasyon sa nasud mao ang kakulang sa pundo alang niini. Unsaon man pagtaas sa kalidad sa atong edukasyon kun ang nasudnong kagamhanan nagtihik-tihik sa paghatag og pundo alang niini.
Tungod sa kakuwang sa pundo nga gihatag ngadto sa edukasyon naglisod ang departamento sa edukasyon sa pagkuha og daghang magtutudlo hinungdan nga moabot ngadto sa tagsa ka gatos ang tinun-an nga naghuot sa usa ka lawak saringanan nga giatiman sa usa ka magtutudlo lamang. Ning maong kahimtang makapaabot ka kaha og taas nga kalidad sa edukasyon?
Ang pagdugang og duha ka tuig sa basic education sa nasud nagkinahanglan na usab og dugang pundo. Kun mogahin naman lang og pundo ang kagamhanang Aquino alang niini, nganong dili naman lang kini ang gamiton alang sa pagkuha og dugang mga magtutudlo ug paghimo og dugang mga lawak saringanan, pagpamalit og daghang mga libro nga magamit sa mga tinun-an nga nag-ilogay sa mga guba nang libro?
Kinahanglang tan-awon pagmaayo sa mga educators nga nagpalibot sa kagamhanang Aquino ang nahuna-hunaan nilang sulbad sa suliran aron ilang makita nga ang nahuna-hunaan nilang sulbad sa suliran nagdugang hinoon sa suliran ug nagpabug-at pa sa mga ginikanan sa pagpaedukar sa ilang mga anak.