Gipangguba sa mga sakop sa Mayor’s Squad nga gipangulohan ni Gerry Marquez ang koral nga gibutang sa usa ka bahin duol sa San Miguel market sa eskena M.J. Cuenco Avenue.
Duna man go’y tawo nga miangkong maoy tag-iya sa maong luna nga daw naporma og “triangle” kay nahimutang man kini sa eskena sa M. J. Cuenco ug Imus Avenue.
Mireklamo kadtong mga tindera nga gipaninglan og abang sa usa ka “Sapio” nga maoy miangkong tag-iya.
Si Konsehal Christopher Alix, chairman sa committee on markets and abattoir, miduso sa reklamo nga iyang nadawat ngadto sa grupo ni Marquez mao nga giaksyonan dayon kini kagahapon.
May kabahin usab sa dalan Magallanes nga gilimpyohan kagahapon sa grupo nila ni Marquez kay gisugdan na usab pagpamaligya og pagkaon daplin sa karsada.
Bravo! Good job Mr. Marquez!
* * *
Apan hagiton nako ang inyong grupo Mr. Marquez nga aksyonan gayod ang mga tigbaligya og imahen sa mga santos diha sa luyong bahin sa Basilica nga wala motuman sa inyong pahimangno.
Gipahimangnoan man god sa grupo nila ni Marquez ang mga Sto. Niño image vendors nga ang ilang mga tinda aha ra g’yod nila ibutang sa stall ug wala nay mga lamesa nga ibutang atubangan sa ilang tindahan.
Kaniadtong miaging Biyernes, pwerte nga nakasaad sa mga tindera nga tumanon g’yod nila ang lagda nga buot ipahimo sa City Hall. Apan pag-agi nako niadtong Martes ug kagahapong adlawa, daw sa wala lang gihapo’y nahitabo.
Syaro og dili mo maglagot ana Mr. Marquez? Tabla ra mo nga gihimong “Kiko-kiko” sa mga tindera. Sa inyong atubangan maayo kaayong mosaad apan sa inyong pagtalikod, igo lang tingali mangatawa.
* * *
Salamat kay ang among barangay hall sa Lorega-San Miguel gipanindot na ni Kapitan Fortunato Parawan.
Ang atubangan nga bahin sa barangay hall — nga maoy kanunay nato nga gipuntareya sa atong pagsaway tungod sa illegal parking – gibutangan na og karatola nga “No Parking Anytime.”
Nindot kaayo. Apan ang pangutana Capt mao kini. Nganong usahay daghan man gihapong sakyanan ang moparking diha?
May sakyanan pa man gani sa mga opisyal sa barangay, anak sa mga opisyal ug uban pa nga anha moparking.
Unsa god ni? Tabla ra man ni sa mga sinultihan sa mga bata nga “Walay klaro uy.”
* * *
Sa Labangon, nagpabusyad lang sa ilang mga tiyan ang mga tanod nga gidistino ni Kapitan Felix Abella diha sa Katipunan duol sa skywalk, apan daw sa wala mahibawo unsay ilang trabaho.
Nagtan-aw sila sa skywalk apan wala makasabot kon nganong gitukod kini diha. Ngano god tawon nga nadawat mo pagka tanod?
Kon nasayod mo sa tumong pagtukod sa skywalk, nganong gitan-aw ra man ninyo ang mga tawo nga manabok lang sa karsada nga wala moagi sa skywalk?
Kanunay ko nga moagi dihang dapita og dili kay ako ra nga motorista ang nagreklamo. Naa pay mga trisikad nga magbahis-bahis ug mosugat usahay sa agianan sa mga sakyanan.
Superbisahe kuno pag-ayo kining imong mga tanod Captain Abella. Law-ay kaayo tan-awon ang imong mga tanod nga nagpabusyad lang sa tiyan, walay gihimo.
Tan-awa ra god ninyo ang tanod sa Day-as ingon man ang usa ka konsehal sa barangay nga maoy kanunay nagdumala sa trapiko sa eskena Imus ug Sikatuna.
Sila maoy mga sulondon ug ehemplo sa ubang tanod ug opisyal sa kabarangayan kon unsaon pag-abag nga hapsay ang dagan sa mga sakyanan.