Duguong adlaw

Malipayon kong mopahibawo nimo nga niadtong, Sabado, maoy labing duguong adlaw sa Sugbo. Kapin sa 500 ka mga Sugbuanon ug mga dumuduong gikan sa kasilinganang mga lalawigan ang nagpaagas sa ilang dugo aron pagluwas og mga kinabuhi. Tungod sa ilang sakripisyo, labing menos 1,500 ka mga biktima sa krimen, sakit ug katalagman ang ilang matabangan.

Way labot ang kapin sa gatos nga wa kapasar sa screening sa upat ka venues, niang listahan sa mga nitabang sa labing lapad nga dinungan nga Kapamilya Bloodletting sa DYAB Abante Bisaya:

l205 ka blood donors sa Ayala Lagoon nga giduma sa Philippine National Red Cross;

l168 sa EMall nga giduma sa Cebu City Medical Center;

l138 sa Sm City nga giduma sa Regional Blood Coordinating Council; ug

l94 sa Gaisano Mactan nga giduma sa Regional Blood Center.

* * *

Sa laing di malalis nga timailhan sa kapaspas sa dagkong kausaban sa teknolohiya, ang electronic mail (email) mao na karoy gideklarar nga bag-ong snail mail. Karon nga ang mga hamtong inanay nang nakaamgo sa panginahanglan ug nakamao nang mogamit sa email, ang mga batan-on nilayat na sa mas paspas ug mas makalingaw pa gyod nga instant messaging (IM).

Ang IM maoy labing kinaham nga paagi sa komunikasyon sa mga tinun-an, mga propesyonal, mga magpapatigayon o mga way laing lingaw nga sakop ning henerasyon sa instant gratification.

Pinaagi sa IM, makaabot dayon ang imong mensahe, matubag dayon ang imong gikinahanglan ug matagbaw dihadiha dayon ang bisan unsa nimong pakisayod. Mao nga kon nipilit pa ka hangtod karon sa email, nahadlok ko nga nabiyaan na ka sa panahon.

* * *

Ang labing popular nga IM sa Pilipinas mao ang Yahoo Messenger; ang AOL Instant Messenger ang hawod sa Estados Unidos; ug MSN Messenger ang dominante sa tibuok kalibotan.

Apan ang labing sayon mao ang Google Chat nga gisukip lang sa Gmail, di na ka kinahanglan nga mo-download og bisan unsang application sa imong desktop. Samang teknolohiya gikatakdang kopyahon sa Yahoo Mail karong tuiga.

Ang gipa-uso sa Google nga pagbutang sa libre nilang applications sa web nakapatumaw sa bag-ong mga kompaniya nga niipon sa pipila ka IMs aron nga mas sayon na nimong gamiton. Ang labing inila mao ang eMessenger, Mabbler, Koolim ug Instan-t.

* * *

Ang Meebo (http://www.meebo.com) maoy akong pinalabi. Mahimo nakong madungan pag-access ang tulo nako ka accounts sa Yahoo, duha sa MSN, tulo sa Google, duha sa AOL, duha sa ICQ ug daghan pang uban sa bisan unsang computer sa bisan asang bahin sa kalibotan.

Maong kon gusto kag sayon, nga mogaan pang imong hard disk, papasa ang bug-at nimong applications sa YM, MSN, GTalk, AIM, ICQ ug uban pa. Meebo na ta!

* * *

Email: leo_lastimosa@abs-cbn.com