Usa ka magbabasa niining lindog mi-text kanako nga nagkanayon: "Good day. Grabe na man kaayo ang among lugar diri sa Carcar, naghitak man ang shabu. Wala gyod masulbad. Unsaon man pagsulbad nga mga opisyal ra man sab ang nagpadagan." -- 0918-4437620 (July 1, 2006--12:12:20)
Maayo unta kadto kon imong gilakip pagtug-an kon unsa nga partikular nga dapit sa Carcar nga naghitak ang shabu aron sayon ra kining tultolon ug monitoron sa atong kapolisan diha. Dako man god kaayo ang Carcar. Pero nagtuo ko nga pinaagi sa intelligence network sa kapolisan, dili kaayo lisod alang kanila ang paghimog pakisusi ilabi na kon mokooperar usab ang mga sibilyan.
Miaslom ang akong dagway sa imong text diin may alegasyon ka nga mga opisyal may kalabotan sa payuhot og drugas. Angayan gayod kining susihon. Tulibagbag gayod kaayong pamation kon tinuod man ugaling kini. Angayan gayod sutaon kon unsa kini ka tinuod tungod kay kon tinuod man, usa kini ka dakong kahiwian.
Sa laing bahin: "Bahin ni sa fixer. Nganong dili imbestigahon kanang anaa sa nag-process sa papeles nga maoy gipaninguhaan sa fixer? Daghan diha nga pagsulod mo diha sa LTO sugaton dayon ka. Unsa man diay buhat sa mga polis ug LTO officials diha? Naay gibutang Beware of fixer, unya wala silay nahimo." -- 0918-2256762 (June 30, 2006--11:05:58)
Mao lagi kanay makapahisagmuyo. Ang pagbutang og pahibalo sa mga bungbong nga Beware of fixers dili ingon ka epektibo kon ang mga opisyal gayod mismo sa LTO ang mangunay pagtabang aron dili mabiktima sa fixers ang mga aplikante.
(Sumbong ug reklamo? Text sa 0910-8105522)