Kon gihimo pa ni Sellon ang pagsang-at og Motion for Withdrawal sa maong kaso, mahimong dunay magduda nga tingali'g nabayran usab siya sa pamilya ni Roderick Go tungod kay klaro man kaayo sa resolusyon sa Department of Justice nga ang gimandoan sa paghimo sa maong lakang mao ang provincial prosecutor.
Nahukman man god ni provincial prosecutor Pepita Jane Petralba nga itugyan ngadto ni Sellon ang resolusyon sa DOJ tungod kay ang maong kaso batok sa upat ka akusado iya man g'yod sa city prosecutors office.
Gawas ni Roderick, ang gipasakaan og kaso mao ang iyang asawa nga si Grace, ang ilang bodyguard nga si SPO1 Roberto Petillos ug ang drayber nga si Henry Baritua Jr.
Ambot og unsa kaha'y kalamboan niining maong kaso kay sigurado man g'yod nga makasugat og grabeng kontrobersiya niini si DOJ Secretary Raul Gonzalez sa pagmugna niya og resolusyon sa kaso nga nahimo na nga "final" sa Supreme Court.
Ang gipasabot nako nga "final" mao ang hukom sa Supreme Court nga ang mga akusado angay gayod nga paatubangon og kaso sa hukmanan. Kon ang ilang pangangkon wala sila makahimo sa salaod nga gipasaka kanila, moatubang sila og husay sa korte.
Dakung lantugi ang atubangon ni Gonzalez kon may gahum ba siya pag-usab sa hukom sa Supreme Court nga gipagawas kaniadtong Marso 20, 2005. Kon ingon man gani niini, sa ato pa ang DOJ na diay maoy labing taas nga "hukmanan" sa nasud.
Sa ako na nga giingon, husto si higalang prosecutor Sellon nga nangayo g'yod usa og katin-awan gikan sa DOJ kon may katungod ba siya nga mopa-withdraw sa kaso diha sa hukmanan nga ang nagpasaka niini mao man ang provincial prosecutor.
Kuyaw man god basin kon ang pamilya ni James King, ang giingong gikidnap ug buot patyon sa mga akusado, magduda ni Sellon nga nakakwarta gikan sa mga Go mao nga siya g'yod ang nangunay sa pagpa-withdraw bisan ug ang provincial prosecutor ang gimandoan sa DOJ.
Kining kasoha nagumikan sa giingong pagtinguha unta pagpatay ni Go, kang kansang liog giluglog sa hait kaayong box cutter sa ka 36 ka higayon. Unya gituyok-tuyok sa lainlaing dapit gikan sa rooftop sa Metrobank building diha sa Plaridel sa wala pa kini ihatud sa Chong Hua Hospital.
Nahibaw-an nga si Roderick Go may utang diay nga P20 milyones gikan ni King, unya ang kantidad mitubo na pag-ayo tungod sa mga interest sa kadugay nga wala mabayri.
Ang pasangil karon, ingnon lang usa nato nga pasangil, mao nga buot patyon ni Roderick Go si King aron maimpas na ang utang. Kini maoy angay gayod nga sulbaron diha sa hukmanan.
Nakaila man g'yod si King sa tawo nga misamad ug mitinguha sa pagpatay kaniya, og kini mao si Roderick Go. Sa daghang mga kaso sa Supreme Court, ang labaw'ng hukmanan nagkanayon:
"The positive identification of the accused will prevail over his mere denial which only serve as his weakest defense."