Pangalagaan ang ilong

ISA sa pinaka-importanteng parte ng katawan ng tao ay ang ilong kaya dapat na ito’y pangalagaan. May pagkakataon na may tumutubong tumor sa ilong na maaaring maging cancer kaya dapat na ito’y tanggalin at dito pumapasok ang tinatawag na nasal reconstruction. Ipinaliwanag ni Dr. Gil Vicente, nose, ear, throat, head and neck surgeon na ang prosesong ito ay gumagamit ng ‘‘flaps" na kinukuha sa noo kaya ang tawag dito ay ‘‘forehead flaps’’ na gagawing hugis ilong at kakailanganin ang dalawa hanggang tatlong beses na operasyon.

Ayon pa kay Dr. Vicente, ang nasal polyps ay isang laman na tumutubo sa loob ng ilong dulot ng infection, allergy at fungus. Ang pasyenteng meron nito ay nakararanas ng pagbabara ng ilong, mabahong sipon, nawawalan ng pang-amoy at masakit ang ulo at pisngi. Dapat na maagang mawala ang nasal polyps. Kung mapabayaan, patuloy ito sa paglaki at operasyon ang kakailanganin. Sa makabagong teknolohiya ay malayo na ang progreso ng panggagamot nito kaya’t minsan lang isasagawa ang operasyon.

Sinabi pa ni Dr. Vicente na sa pamamagitan ng nasal reconstruction ay mapapanumbalik ang anyo at hugis ng mukha kung kaya’t muling matatamo ng pasyente ang kasiyahan at pagtitiwala sa sarili.

Para sa karagdagang kaalaman sa nasal reconstruction at mga kaugnay na karamdaman sa ilong maaaring kumunsulta kay Dr. Vicente na nagki-clinic tuwing Lunes hanggang Biyernes sa Jose Reyes Medical Center mula alas-diyes ng umaga hanggang alas-dose ng tanghali at mula alas-dos hanggang alas singko ng hapon ay nagki-clinic naman siya sa St. Luke’s Medical Center, Quezon City.