Ang Kilusang Magbubukid ng Pilipinas Cebu hugtanong misupak sa dili makiangayon nga plano sa administrasyong Aquino sa pagpadayon peke nga programa sa reporma sa yuta nga mao ang CARPER.
Ang Comprehensive Agrarian Reform Extension with reform kon CARPER usa lang ka ibedensya nga pakyas ang administrasyong Noynoy Aquino sa pagsulbad sa nasudnong problema sa yuta. Imbes nga hatagan og yutang matikad ang mga mag-uuma nga maoy nagbuhi sa katawhang Pilipino, ila hinuon gihikawan sa kahigayunan nga makapanag-iya og yuta ug mapalambo ang produksyon sa pagpanguma.
Ang Department of Agrarian Reform office kinsa responsible usab sa pagprotektar sa katungod sa mga mag-uuma nga motikad, wala katuman sa paghatag serbisyo ngadto sa mga mag-uuma. Ang pamilyang Cojuangco usa sa mga inilang mga hasyendero nagpadayon sa pagdektar sa proseso sa produksyon sa agrikultura ug kontrolon ang mga kabus nga mga mag-uuma uban sa ilang loyalista gikan sa DAR.
Kon ingon niini ang kanunay’ng dagan sa ilang serbisyo, padayon nga masinati ang kalisud ug kagutom sa mga mag-uuma uban sa tibuok katawhang Pilipino. Sa napulo ka mag-uuma pito niini walay yutang matikad. Mayoriya kon 70% sa atong populasyon mga mag-uuma.
Kung sensero si Presidente Noynoy Aquino sa iyang programa nga matuwid na daan, angayan nga paminawon ang dugay nang gipangayo sa mga mag-uuma nga yuta alang sa nagtikad ug suportahan nga mapasa ang balaodnon nga House Bill 374. Ang KMP-Cebu mihagit kaniya nga ipanghatag ang mga kayutaan nga gitikad sa mga mag-uuma ug dili bawion. Ibasura ang mini nga CARPER.