MANILA, Philippines - Upang matiyak ang kaayusan sa pagdiriwang ng Chinese New Year, inutos ni Manila Mayor Alfredo Lim ang pagpapakalat ng karagdagang pulis sa buong Chinatown.
Sa kanyang pakikipagpulong kay Manila Police District (MPD) Director Gen. Roberto Rongavilla at Station 11 Commander Senior Supt. Ferdinand Quirante, pinag-usapan ang pagbibigay ng seguridad sa gaganaping aktibidades bunsod na rin ng pagdagsa ng tao sa Filipino-Chinese community bilang pagsalubong bukas sa ‘Year of the Metal Rabbit’. Dapat na maiwasan ang anumang pananamantala ng mga kriminal lalo pa’t may isasagawang fireworks at pagtatanghal sa Chinatown.
Maging ang daloy ng trapiko sa lugar ay kailangan na matutukan upang hindi makaapekto nang lubusan sa mga motorista habang isinasagawa ang parade.