MANILA, Philippines - Isang pulis at isang barangay tanod ang nasawi habang isa pa ang sugatan nang pagbabarilin ng isang grupo ng mga sundalo dahil lamang sa pagtatalo sa operasyon ng peryahan sa lungsod Quezon kahapon ng madaling- araw.
Base sa ulat ni Supt. Alex Sintin, hepe ng Quezon City Police District-Police Station 3, kinilala ang nasawi na si PO3 Wilfredo Macatangay ng Batasan Police Station 6 at ang tanod na si Alex Bersamin ng Barangay Holy Spirit sa lungsod. Nakilala ang sugatan na si Reynaldo Ibanez, purok lider ng naturang barangay.
Nasa pangangalaga naman ng Criminal Investigation and Detection Unit ng Quezon City Police sa Camp Karingal ang mga sangkot na sundalong sina Staff Sgt. Elgar Aclan, 37; Cpl. Eugene Villavier, 32; PFCs. Delfin Viaje, 32; Ariel Molina, 29; Rafael Lantano, 31; Rannie Bartolay, 29; at Roberto Chiong, pawang mga miyembro ng Philippine Army-Civil Military Unit Battalion.
Lumilitaw sa imbestigasyon ng pulisya na dakong alas-12:00 ng hatinggabi nang maganap ang barilan sa may Carnaval/ Perya sa Nawasa Road, Luzon Ave., Pasong Tamo sa lungsod.
Bago nito, nagkaroon ng komprontasyon sina Ibanez at isa sa mga sundalong suspek na lasing kaugnay sa operasyon ng perya sa nasabing lugar.
Sa kainitan ng pagtatalo ay pinaputukan ng sundalo si Ibanez na agad namang nasugatan ngunit sa kabila nito ay nagawa pang makahingi ng tulong sa mga kasamahang tanod.
Agad namang rumesponde sina Macatangay at Bersamin sakay ng sasakyang SB-17 ngunit pagsapit dito ay pinagbabaril sila ng mga suspek.