Patay ang isang 47-anyos na single mother makaraang magbigti umano ito matapos na makipag-usap sa telepono sa kanyang nobyong dayuhan kamakalawa ng gabi sa Marikina City.
Idineklarang dead on arrival sa St. Vincent Hospital ang biktimang si Norma Velasquez, residente ng Corinthian St., Oro Vista Subdivision, Brgy. Concepcion Uno ng lungsod na ito.
Ayon kay PO1 Nelson Cruz, may hawak ng kaso, dakong alas-10:10 ng gabi nang matagpuan ang biktima ng kanyang anak na babae sa ikalawang palapag ng kanilang bahay na nakabigti gamit ang mahabang electric wire na ipinulupot sa kanyang leeg at isinabit sa kisame ang kabilang dulo.
Sa pahayag ng anak ng biktima na hindi na nagpabanggit ng pangalan, bago ang pagpapakamatay ay nakita pa niyang kausap ng kanyang ina ang nobyo nitong Arabo sa cellphone at umiiyak na ito.
Matapos ang pag- uusap ay umakyat na umano ang kanilang ina sa kuwarto nito sa ikalawang palapag ng bahay.
Makalipas ang may ilang oras na hindi lumabas ng kanyang kuwarto ang biktima ay minabuti na itong puntahan ng kanyang anak upang kausapin sana subalit laking gulat nito ng bumungad sa kanyang harapan ang biktima na nakabigti.
Mabilis na naisugod sa nasabing pagamutan ang biktima ng mga kaanak subalit wala na ring nagawa ang mga sumuring doktor.
Teorya ng pulisya na posibleng nagkaroon ng personal na problema ang biktima sa kanyang nobyo dahilan upang malungkot ito at maisipang magpakamatay.