Nahaharap sa reklamo ang isang tauhan ng Manila Police District makaraang “kumuha” ng halagang P6,000 sa isang bisita sa isang bahay na kanyang pinuntahan sa Sampaloc, Maynila kahapon ng madaling-araw.
Personal na dumulog sa tanggapan ng MPD-General Assignment Section ang biktimang si Raul Sosa, 53, ng 507 F. Cayco St., Sampaloc upang ireklamo si SPO1 Nereo Vargas, nakatalaga sa MPD-Station 4.
Naganap umano ang insidente dakong alas-2:00 ng madaling-araw sa isang bahay sa Felina St..
Nauna dito, nakitulog umano ang biktima sa bahay ng di pinangalanang kaibigan. Dumating naman ang suspek na lasing at hinanap ang may-ari ng bahay na umano’y kaibigan din nito.
Ikinabigla ng suspek na ibang tao ang nasa loob ng bahay kaya naghinala ito at kinapkapan ang biktima at nang makapa ang pitaka nito na may laman na P6,000 ay kinuha ito saka umalis.
Hindi umano nagpang-abot ang may-ari ng bahay at ang suspek dahil pag-alis ng suspek ay siya namang paglabas ng may-ari ng bahay mula sa palikuran. (Grace dela Cruz)