Isang 22-anyos na umano’y bading na hairdresser ni Ricky Reyes ang nagpakamatay sa pamamagitan ng pagbigti kahapon ng umaga sa Pandacan, Maynila.
Hinihinalang may ilang oras nang patay bago natagpuan ang bangkay ni Bonifacio Yabut, hairdresser ng Ricky Reyes Salon sa Farmers mar ket branch sa Cubao Quezon City at residente ng 1733 Interior 6, Barrio San Vicente Pedro Gil, Pandacan.
Sa report ni Det. Paul Dennis Javier ng Manila Police District-homicide division, dakong alas-7:30 ng umaga nang madiskubre ng kapatid nitong si Eleonor Balboa ang biktima na nakabitin ang leeg sa kisame gamit ang isang electrical cord sa loob ng kuwarto nito.
Ayon kay Eleonor, huling nakitang buhay ang biktima dakong alas-12:30 ng hatinggabi habang nanonood ito ng television.
Idinagdag pa ni Eleonor, wala silang alam na dahilan kung bakit nagpakamatay ang kanyang kapatid dahil wala silang alam na problema nito subalit sa narekober na suicide note ay nakasaad na pagod na umano ito sa araw-araw na ginagawa niya sa kanyang buhay.
Hiniling din ng biktima sa kanyang suicide note na i-cremate ito at huwag ding ipamamalita sa kanyang mga kasamahan sa salon na patay na ito hanggang hindi inililibing.