Lupaypay pa nang magtungo sa himpilan ng Central Police District (CPD) Station 2 ang dalawang biktima na sina Albert Barangko, 17, ng Iligan St., San Francisco del Monte at Michael Vincent, 17, upang ireport ang ginawang panghoholdap sa kanila.
Ayon sa pahayag ng mga biktima, dakong alas-9 ng gabi habang sila ay naglalakad sa kahabaan ng Dangay St., Veterans Village, QC nang biglang sumulpot ang dalawang suspect na armado ng patalim at sabay pahayag ng holdap.
Dinala ang mga biktima sa isang madilim na lugar at kinuha ang mga cellphone, wallet at mahalagang kagamitan.
Nang makuha ang pakay ng mga suspect sa mga biktima ay mabilis na tumakas ang mga ito sa hindi mabatid na direksyon.
Samantala, kasalukuyang nagsasagawa ng follow-up operation ang mga awtoridad upang madakip at makilala ang mga salarin. (Ulat ni Angie dela Cruz)