Tulo ka teenagers nga babaye ang nakita ni Lito nga diha atubangan sa usa ka bakery sa eskena Panganiban ug Sanciangko.
Atul nga gigutom si Lito mao nga giparking niya ang iyang kotse atubangan sa bakery. Nanaug siya ug mipalit og makaon.
Milingkod si Lito sa usa ka lingkoranan ug gitungab ang usa ka botelya sa softdrinks nga iyang gipares sa giorder niya nga pan-de-coco.
Diha pa masuta ni Lito nga gwapa ang usa niadtong tulo ka teenagers nga diha maglingkod sa pikas lamesa. Nagsigi kini’g tutok sa iyang sinaw nga kotse nga giparada atubangan sa bakery.
Kanindot kaha sakyan aning awtoha no? Bag-o pa kaayo,” matud sa usa ka babaye nga may pagka komedyante.
Mitimang kadtong gwapa sa tulo ka babaye. “Ako kun dunay manguyab nako nga dunay awto sugton gayud nako dayon.” Nakapahiyom si Lito nga naminaw sa tulo ka dalagita.
Sa iyang bana-bana, nagpangedaron pa og 16-anyos ang duha kanila ug mga 17-anyos kadtong gwapa kay maila man sa ilang pamayhon. Human og snack ni Lito, wala dayon siya milakaw.
“Gusto mo mosakay sa akong kotse?” gipangutana ni Lito ang mga teenagers. “Pasakyon mi nimo sir?” halos magkadungan ang tulo ka teenagers. Pareho sila nga mitutok kaniya.
“Huwata ko ninyo didto sa unahan kay pasakyon ko kamo,” hinay ang tingog ni Lito ngadto sa tulo ka teenagers. Dili siya gusto nga makadungog ang tindera sa bakery nga pasakyon niya ang mga babaye. Tuod, nagpahiyom ang tulo ka dalagita nga milakaw paingon sa unahan. Misakay dayon si Lito sa iyang kotse ug miatras. Nakita niya sa unahan nga nagpanglingi ang tulo ka babaye.
Gihunongan dayon ni Lito ang tulo. Gituyo ni Lito nga kadtong gwapa sa tulo diha niya gipalingkud sa front seat sa kotse tupad niya. Ang duha didto sa luyo milingkod.
“Asa ang gusto ninyo suroyan nato,” gisukna ni Lito ang mga teenagers. “Bisan asa,” matud sa usa nga diha maglingkod sa iyang luyo.
Walay tumong nga gipadagan ni Lito ang kotse. Gisubay na nila ang dalan Colon. Nakahuna-huna siya nga mohapit sila sa Plaza Independencia. Didto sa Plaza Independencia, nalingaw kaayo ang mga dalagita.
Nasayran ni Lito nga Stella diay ang ngalan sa gwapa nga diha niya gipalingkod tupad kaniya. “Unsa to’y gisulti nimo ganina, kon may manguyab nimo nga de-kotse imong sugton?” gisukna ni Lito ang gwapa nga dalagita.
“Depende. Disi-otso na man ‘sab ko og pwede na manguyab,” nagkatawa nga mitubag si Stella kang Lito. (Sumpayan)