Gula 7
Nananghid sila si Lino ug Precy nga moundang na pagtrabaho sa balay diin sila magsilbi isip boy ug maid.
Apan nakita nila nga mihilak si Mrs. Sante human makadungog nga mopahawa na sila. “Makaako ba diay kamo nga talikdan ko nga mag-inusara? Masakiton na ako Lino, Precy, kamo na lang akong paglaum kay wala kami anak si Marco.”
Kahilom ang misanap sa tibuok lawak. Nagkatinutokay sila si Lino ug Precy. “Lain man gud huna-hunaon Ma’am nga magpabilin ko dinhi nga ako ra ba ang nakapatay ni Sir,” ni Lino pa.
“Ayaw kana og huna-hunaa Lino, igo ka ra nga nagtuman sa imong katungdanan nga panalipdan ang imong kauban sa trabaho nga among-amongan unta sa akong bana. Mao man gani nga wala na ako mokiha pa,” pasabot ni Mrs. Sante nga namahid sa luha.
Giabot og kaluoy ang mga katabang ni Mrs. Sante. “Mosugot ka ba Prec nga magpabilin lang kita dinhi? Kuyaw lang kun samokon ta’s espirito ni sir Marco,” matud ni Lino.
“Mag-agad lang ko nimo Lin. Kun moingon ka nga magpabilin ta, dili ko mosupak kay luoy man usab si Ma’am. Lahi siya og batasan ni Sir nga usahay may pagka sapoton,” ni Precy pa.
“Salamat kaayo mga anak,” ni Mrs. Sante pa. Nakurat sila si Lino ug Precy pagkadungog nga gitawag sila og mga anak sa ilang agawon. “Wala kami anak si Marco. May gisagop kami apan milayas kay gitapolan pag-atiman nako.”
Nanglabay ang mga adlaw, buwan ug kapin sa tuig. Gipatawag sila ni Mrs. Sante. “Lino, mitug-an na kanako si Precy nga may relasyon kamong duha. Nalipay ko kay gikan karon, kamo na ang akong ilhon nga mga anak,” matud ni Mrs. Sante.
Nakalitan na usab sila si Lino ug Precy. “Moanhi ang akong abogado karon kay magpabuhat ako og kasuwatan nga kamo na ang manununod sa akong gamay’ng katigayonan kun wala na ako sa kalibotan.”
Gikan niadto, misamot ang pagpangga nila ni Lino ug Precy kang Mrs. Sante nga giisip na g’yud nila nga tinuod nila kini nga inahan. Usa ka buntag niana. “Precy, Lino, gisugo nako ang tagdumala sa akong negosyo nga hikayon ang inyong kasal sa labing dali nga panahon.”
“May gikontrata na ako nga mo-renovate niining balay kay anhi dinhi sauloga ang inyong kasal. Ipaandam nako ang usa ka nindot nga kwarto para kaninyong duha,” nagpahiyom si Mrs. Sante.
Wala makapugong sila si Lino ug Precy sa ilang kalipay. Nagginaksanay sila atubangan ni Mrs. Sante. Dayon gigakus usab nila ang ilang agawon nga tugob sa pagmahal. (Kataposan)