Gula 7
“Maayo kay gipasulod ka na dinhi sa selda sa mga babaye. Ako si Sheila, ang mayor dinhi sa selda sa mga babaye,” nagpaila kang Orchids ang tomboyon nga babaye.
Giubanan ni Sheila si Orchids sa iyang higdaanan. Usa kini ka double deck nga katre ug sa tupad dunay mga priso nga naglingkod ug ang uban naghigda nga mitutok lang kaniya.
“Adto lang ko sa akong kubol-kubol kun may tuyo ka kanako Orchids,” ni Sheila pa nga mibiya sa ilang nahimutangan. Pagka gabii, gimingawan kaayo si Orchids didto sa selda sa mga babaye.
Usa ka priso ang miduol kang Orchids ug mihunghong. “Paadtoon kuno ka sa kubol-kubol ni Sheila karon dayon.” Wala maglangan si Orchids, giadto dayon niya si Sheila.
“Magpamasahe ko nimo Orchids,” giingnan ni Sheila ang dalaga. Wala siya makabalibad. Hamugaway ang kubol-kubol ni Sheila ug nabuwag kini sa ubang mga kubol-kubol.
Sa tanto niya nga masahe ni Sheila, kalit siya nga gigakus sa tomboy. “Orchids, lipaya ko karong gabhiona.” Nakalitan kaayo si Orchids ug kasinggiton apan wala kini mahimo bisan og gihukasan na siya sa tomboy.
Gihilasan kaayo siya sa sitwasyon kay pareho ra nga babaye ang naghapyud-hapyod sa iyang lawas, apan takulahaw lang nga gihakup siya sa tumang kalalim ilabi na nga gihapyod na ni Sheila ang pribadong parte sa iyang lawas.
Daw mikilab lang ang mga gutlo…gipaundayonan ra niya si Sheila nga miromansa kaniya ug nakab-ot ra usab nila ang kalipay sa usa’g-usa.
Hapit na tungang gabii nga mibalik si Orchids sa iyang higdaanan. Gihuna-huna niya ang iyang sitwasyon sa bilanggoan. Wala niya tuyoa nga nakahilak siya nga naghuna-huna sa iyang kapalaran.
Milabay ang mga adlaw. “Orchids, paadtoon ka sa administrative officer, ni Sir Leon.” Gikulbaan na usab si Orchids.
“Makalaya ka na gikan dinhi sa prisohan Orchids. Gi-dismiss sa korte ang imong kaso kay mipirma og affidavit si Ronald nga wala kay labot sa pagbaligya og shabu. Gibutyag niya ang tinuod,” matud ni Leon.
“Tinuod ka Sir? Makagawas na ko?,” walay sukod ang kalipay ni Orchids. Gihipos dayon niya ang iyang mga sapot. Apan sa wala pa siya mogawas, “Sir Leon, pwede ba nako ikaestorya si Ronald?”
Misugot si Sir Leon. “I love you Orchids. Iampo nga makagawas unta ko sa prisohan aron magminyo ta,” gigunitan ni Ronald ang kamot ni Orchids dungan sa pagpanglugmaw sa iyang mga luha. (Kataposan)