Nasabtan ni Colleen ang tanan. Mao diay nga wala na magpakita si Cody sa ilang pinuy-anan kay gibuwagan na man diay kini sa iyang Ate Alexa. Wala siya magdahom nga mahitabo kini sa relasyon sa duha. Nagtuo siya kaniadto nga intact na kaayo ang relasyon nila ni Cody ug Alexa.
Makaliton gayod diay ang panahon. Ingon sa nakalitan pag-ayo si Colleen sa dagan sa mga panghitabo. Saksi siya sa katam-is sa pagminahalay nila ni Cody ug Alexa. Apan nabugto lang ang relasyon sa duha sa dakong kasayon. Ug karon sila na si Alexa ug Jack na ang nagkarelasyon.
Ingon sa dili siya makatuo. Ingon ba niini ka-fragile ug ka-unpredictable sa kinabuhi dinhi sa kalibotan?
“Wa ka kaha masayop niining imong desisyon, Ate?” Sukit ni Colleen sa maguwang.
“Nganong nakapangutana ka’g ingon niana, Sis?” Misumbalik sa pagpangutana si Alexa.
“Tingalig magbasol ka niining hinanali mong desisyon sa pagbugto sa relasyon ninyo ni Cody?” “Dili mahitabo nga magbasol ko, Colleen. Nakaseguro ko nga mas nindot ang akong kaugmaon uban kang Jack tungod kay adunahan siya. Bisan pa’g makatrabaho na unya si Cody isip magtutudlo layo ra gihapon siya kun itandi kang Jack tungod kay nanag-iya og daghang patigayon ang amahan niini. Ang kabuotan ni Cody dili makaon.” -- Sumpayan pa