Gula 7
Gi-delete dayon niya ang text ni Brendan. Wala siya malipay sa maong mensahe bisan og tam-is kaayo ang unod niini. Wala niya tubaga ang text ni Brendan.
Dugay nang nangulitawo si Brendan kaniya. Estudyante si Brendan sa laing unibersidad sa kurso nga civil engineering, samtang si Colleen nagtungha usab sa kursong accountancy ug naa na siya karon sa ikatulong tuig sa maong kurso.
Buotan ug ambongan usab si Brendan. Apan wala gayod mobati og paghigugma si Colleen ngadto niini. Hinigala lang ang iyang pagtagad kang Brendan. Kay ang iyang gihigugma mao si Cody nga hinigugma na sa iyang maguwang.
Sa makadaghang higayon, gipaningkamotan ni Colleen ang pagpatay sa gibati niyang paghigugma ngadto ni Cody. Nasayod siyang dili na angay nga mobati siya’g paghigugma ngadto sa maong lalaki tungod kay hinigugma na kini sa iyang maguwang. Apan lisod alang kaniya ang paglangkat kang Cody gikan sa iyang kasingkasing. Gimahal gayod niya ang ulitawo.
Gisulayan na niya ang pagtuon sa iyang kaugalingon nga higugmaon si Brendan kinsa sulod sa taas nang kutay sa panahon mapailobon nga nagpaabot nga iyang mahalon. Apan dili gayod madawat si Brendan sa iyang kasingkasing. Iyang nasuta nga walay luna si Brendan sa iyang dughan.
Mitingog na usab ang message alert tone sa iyang cellphone. Si Brendan gihapon ang nagpadala kaniya’g text message. Gibasa niya kini. (Sumpayan pa)