Abtik si Ramil nga misapo sa kamot sa iyang asawa dihang mihikap na unta kini sa iyang pikoy.
Gibati og kahiubos si Rose sa gihimo sa iyang bana ug dali kini nga mitakilid, gitalikdan ang iyang bana nga si Ramil. Nakasabut si Ramil nga nahiubos si Rose kaniya apan wala lang niya kini tagda.
Milabay ang mga adlaw, ngadto sa mga semana ug buwan nga wala gayud makatilaw si Rose og hingpit nga kalipay sa iyang bana nga si Ramil. Inanay kini nga nakapausab sa ilang maayong pagsinabtanay. Miabut g’yud ang higayon nga naglalis-lalis na sila. Inanay na nga mikagiw ang ilang maayong relasyon.
Wala na makaantos sa iyang kahimtang, gisaysay ni Rose ang iyang sitwasyon sa kaila niya nga si Atty. Eddie Bolonos. Gitambagan siya sa abogado nga kun dili siya makaagwanta, mahimong ipa-annul niya ang ilang kasal.
Nasayran ni Ramil ang pagdangop ni Rose og usa ka abogado nga gisaysay ang ilang sitwasyon. Nakapadaku pa kini sa ilang panag-away. Ang malipayon nila nga panag-uban nahimong daw impyerno alang kanila. Wala na g’yud makaantos pa si Rose, gisang-at g’yud niya sa korte ang annulment case aron magbuwag na sila si Ramil.
Gigamit nga basihanan ni Atty. Bolonos ang kaso sa usa ka Chi Ming Tsoi, usa ka Insik nga nakigminyo og gwapa kaayo nga Filipina.
Sa maong kaso si Chi Ming Tsoi wala gayud mohimo sa naandan na nga himoon sa bana ug asawa sulod sa modul-an na usa ka tuig gikan sa ilang kaminyoon ni Gina niadtong 1988.
Ang Supreme Court mihukom nga “void” ang kaminyoon nila ni Chi ug Gina tungod kay ang maong Insik “phychologically incapacitated” sa iyang pagka bana ug gitugot ang ilang legal nga panagbuwag.
Kay maayo man kaayo ang pagpresentar ni Atty. Bolonos sa kaso ni Rose didto sa korte, wala magduha-duha si Judge Rick Sarmiento sa pag-anular sa kaminyoon ni Ramil ug Rose.
Wala damha nga sa tanto nga panagsuod nila ni Atty. Bolonos ug Rose, inanay’ng miturok sa tagsa-tagsa nila ka kasing-kasing ang gugma. Ulitawo si Atty. Bolonos ug walay kabilinggan sa kinabuhi.
Bisan og minyo si Rose apan nasiguro si Atty. Bolonos nga wala gayud kini mahilabti sa iyang bana nga si Ramil ug mao gani nga mipasaka kini og annulment case.
Nakahukom sila nga magminyo. Sa unang gabii sa ilang kasal, daw gikulbaan na usab si Rose. Gipaningot siya’g bugnaw tungod sa nasinati niya sa bana niya kaniadto nga si Ramil.
Giduol siya ni Atty. Bolonos ug gihunghongan. “Matagbaw ka na g’yod karon Rose. Romantiko kaayo ko lahi ni Ramil.”
“Pag-tsur diha uy,” miagik-ik si Rose pagkadungog sa gihunghong kaniya ni Atty. Bolonos. Gipakaligo dayon ni Atty. Bolonos og nag-aso-aso nga hawok si Rose. (Kataposan)