Gula 37
Nakadawat si Rosalinda og sulat gikan sa iyang mga ginikanan. Hapit magdungan pag-abot og ang sulat gikan ni Daniel. Labihan niyang lipaya.
Una niyang gibasa ang sulat sa iyang mga ginikanan. Ang unod sa maong sulat naghulagway lang sa kahimtang sa iyang mga mahal sa kinabuhi didto sa ilang lungsod sa Dalaguete.
Gisunod dayon niya’g basa ang sulat ni Daniel. Humot kaayo ang papel ug sobre nga gigamit sa iyang hinigugma sa sulat niini kaniya. Nangalisbo ang kahumot niini dihang iyang giablihan.
Naghubit sa kamingaw ang sulat ni Daniel kaniya. Gipadayag niini sa sulat nga gimingaw na kini pag-ayo kaniya. Samtang nagbasa sa sulat sa hinigugma, gibati na usab hinuon niya ang tumang kamingaw ngadto niini.
Gibalosan niya ang sulat ni Daniel. Sa sulat, iyang gipasaligan ang hinigugma nga maayo ang iyang pagkabutang sa siyudad. Buotan ang iyang agalon nga si Atty. Pomposo Gumera. Apan wala niya tug-ani ang hinigugma bahin sa pagpangulitawo ni Bongkoy kaniya. Dili siya buot nga mabalaka si Daniel kun masayod mahitungod niini. -- Sumpayan pa