Usa sa unom mao ang kinabag-uhang sakop sa Bisrock band nga Scrambled Eggs - si Jay-r "Itchoy" Siaboc. Akong nahimamat ang maong batan-on sa buwan sa Abril alang sa artikulo nga akong natagik sa The Freeman Entertainment section pagka Abril 27 nga nag-ulohan og "The continued beating of Scrambled Eggs" kauban ang lain pang mga sakop sa banda nga silang Louie "Lewy" Espinosa, Nelson "Chang" Martizano ug Neil "Bomberman" Lumeran.
Si Itchoy maoy mihulip sa kanhi vocalista sa Scrambled Eggs nga si Clenn Sunico nga karon mao na pud ang vocalist sa bandang Manu-Manu nga nakabase na's kaulohan. Gilarawan nako si Itchoy sa una namong panagkita nga "Johnny-come-lately" sa maong pundok apan dili siya matawag og bag-o gyud sa natad sa pagkanta tungod kay makadaghan nang higayon nga siya ang nahimong frontman sa nagkalain-laing banda sa wala pa siya taga-i sa talagsaong higayon nga maoy mahimong pangunang tingog sa Scrambled Eggs.
Ang Scrambled Eggs nahimugso niadtong 1996 pa ug mas nainila sa ilang kantang "Kada Uli Hilot", nga migamit sa istilong yodel nga gipauso ni Fred Panopio, ug milangkat sa Artist of the Year Award niadtong tuiga isip pasidungog kanila sa tulumanon sa dyRT nga "Brown Underground Sounds".
Sa dihang nag-organisar ang Mactan Marina Mall sa Lapu-Lapu City niadtong Mayo og usa ka kalingawan- ang Whatta Hottah Summah - diha sa parking lot sa maong establisamento, usa ang Scrambled Eggs nga gidapit alang sa maong linawas nga pasundayag. Ug didto namatikdan ang katakos ni Jay-R sa pagkanta ug pagsayaw. Dali niyang napahaum ang iyang paningog sa mga kanta nga kanhi-ay tingog ni Clenn ang nagpaluyo. Mao usab kining katakos ang iyang gipakita atol sa April 8 gig sa banda diha sa Handuraw Events Café ug niadtong April 22 atol sa Earth Day.
Makatigi ni Jay-R ang lain pang mga talentong Bisdak nga silang Rutchelle Borbajo, ang lounge nightingale diha sa Waterfront Hotel; si Charisse Mari "Chai" Fonacier nga batid sa pagtukar sa silindro ug vocalista sa bandang Balde ni Allan; Handrew Sincero nga host sa lokal nga variety game show "Sabado Na, Game Na!"; Panky Trinidad ang vocalist sa rock band nga Anino nga regular magkantahan sa Handuraw ug Kahayag Café, ug si Migs del Socorro nga nagtrabaho isip usa ka customer service representative.
Ugma sa dili pa sugdan ang maong paglusad dinhi sa dakbayan sa Pinoy Dream Academy, mag-abot ang mga Bisrockers ug ang mga clans dinha sa Fuente Osmeña circle mga alas 5:30 sa kahaponon alang sa himoong hinugpong nga pag-martsa padulong sa Kapitolyo isip suporta kang Jay-r, usa sa mga pinalanggang sakop sa Bisrocking community, ug sa laing lima ka mga talento.
Makauban sa mga Bisrocker clans si DJ Ram Dizon sa 93.1 Smash FM kansa usa sa mga nagduso sa paningog nga Bisrock sa kahanginan, ug padayong nagsuporta sa mga banda kauban ang iyang partner nga si Bré Ambungan Abrea. Atangi usab ang mga online chatters sa MIRC Bisrock channel nga mosalmot sa maong panagtigom alang sa pagpakita sa ilang pagtoo nga aduna'y dakong luna si Jay-r "Itchoy" Siaboc sa Pinoy Dream Academy nga pagadumalaon ni Jim Paredes sa Apo Hiking Society.