Kay ilang gipadayag ang hiyas sa pagpatunga,
Gisalikway sila ug gitukmod sa pagbiya
Ug gi-isip nga manananggal silang Sayong ug Celing,
Angayan nga buwagon sa kahapdos sa asin
Sa pagtunglo ug pagtamay sa kasilinganan,
Kagikan, kaparentihan, ug kahigalaan.
Kay nibarog silang ‘di monopoliya ang kinaadman
Ug ‘di ingong sakto ang naandang gituhu-an,
Gi-isip nga manananggal silang Sayong ug Celing
Ug angayang buntugon sa kahapdos sa asin
Sa panghunahuna’ng kadaot lang ilang matampo,
Wala’y bisan gamay nga katahom o kaayo.
Kay ang ilang pagtuo, dili lang ingon nato,
Ang kinahanglang tagaan og lawom nga respeto,
Gihukman nga manananggal silang Sayong ug Celing
Ug angayang silotan sa kahapdos sa asin
Sa pagtunglo ug pagtamay sa ilang pagladlad
Sa kuno pako sa kadunot ug samad.
Kay ‘di lang ang nabalaod ang ilang gidawat
Ug ang panuki-duki ila nga gibuhat,
Gisangyaw nga manananggal silang Sayong ug Celing
Ug angayang lumsan sa kahapdos sa asin
Aron bisa’g makalingkawas, sigurong makuso-kuso
Ang ilang utok ug pagbati nga masakiton ug subersibo.
Kay padayon nilang gi-ampingan ang hiyas sa pagpatunga,
Ug gi-amuma aron dili mahi-agom sa pagpasipa’a,
Gipatuo nga manananggal silang Sayong ug Celing
Ug angayang ilubong sa kahapdos sa asin
Aron masigurong di na gyud sila makabangon
Ug makasaulog og usa pa ka tam-is nga kabuntagon.
Apan . . .
Kay gibuligan sa hiyas sa tim-os nga gugma
Sa Magbubuhat, sa Tunhay, sa Kinabuhi ta,
Gibuntog ang pagtulun-ang silang Sayong ug Celing
Manananggal nga mokuyos ug masunog sa asin.
Wa’y kaparat nga nakabuwag nilang duhang daw tinunga
Kay ang matuod ang kinatibuk-an ang nagkinabuhi sila.