MANILA, Philippines - Mababawasan lamang ang galit ng mga Hong Kong nationals tungkol sa madugong hostage crisis na nangyari sa Quirino Grandstand kung saan walo sa kanilang kababayan ang napaslang kung may mapaparusahang opisyal ng pamahalaan sa Pilipinas.
Ayon kay Senator Loren Legarada, pinuno ng Senate Committee on Foreign Relations, hindi aniya tamang magdusa ng husto ang ating bansa ng dahil sa kapabayaan at kapalpakan ng ilang mga opisyal ng gobyerno.
Sinabi ni Legarda na walang dapat na paligtasin ang Incident Investigation Review Committee (IIRC) sa mga dapat managot sa naturang trahedya dahil dito nakasalalay ang mabilis na paghupa ng galit ng mga Hong Kong at Chinese nationals.
Giit pa ni Legarda, dapat tiyakin ng IIRC na hindi magiging bias sa halip ay transparent at komprehensibo ang isinagawa nitong marathon hearing.
Binabantayan aniya ng husto hindi lang ng HK at Chinese government maging ng buong mundo ang ginagawang imbestigasyon ng IIRC.
Samantala, iginiit din ni Legarda na dapat umanong managot sinuman ang responsable sa sinasabing maling paglalagay ng label sa mga labi ng tatlong Hongkong nationals na biktima ng hostage taking dahilan kaya nagkamali din ng pinagpadalhang pamilya sa mga ito.