CEBU, Philippines — Ang Artera team mipayaka sa Fernandez Optical, 88-78, aron langkaton ang titulo sa kampiyonato sa Badbeat Basketball League Season 3 didto sa Sacred Heart Sports Center sa may dalan D. Jakosalem sa dakbayan sa Sugbo.
Si James Martin ang gibayaw nga Finals MVP human gipangulohan ang Artera uban ang 15 puntos.
Si Martin nakakuha og dakong suporta gikan nilang Paul Sungahid ug Jeff Michael Gudes nga nagkumbinar og 25 puntos.
Alkansi ang Artera og dos puntos, 19-21, human sa unang kuwarter, apan dali nga miresbak aron kontrolahon ang duwa sa halftime, 38-37, sa hingpit.
Ang Artera ni coach Peter Rex Jumuad midominar sa Fernandez Optical sa final half aron pagkab-ot og impresibong 10 puntos nga kadaogan.
Si Albert Ardiente maoy nangu sa Fernandez Optical bitbit ang 14 puntos samtang sila si Gio Antigua ug Joemarie Beloro mitali og 13 puntos matag usa sa pilderong kawsa.