CEBU, Philippines — Ang Shangri-la Mactan Cebu, Kandaya Resort, Seda Central Bloc, ug JPark Island Resort mitagak sa tagsa-tagsa nila ka mga karibal aron pag-abante sa basketball semifinals sa Hotel Resort and Restaurant Association of Cebu, Inc. (HRRACI) Sportsfest 2024 niadtong Biyernes, Hunyo 21, didto sa Capitol Parish Gym sa may dalan Escario, dakbayan sa Sugbo.
Ang Shangri-la mibugha sa Quest Hotel, 85-80, luyo sa mainit nga mga kamot ni Jonathan Canceran nga miharos og 26 puntos, unom ka rebounds, duha ka assists, ug usa ka steal.
Wala sab magpa-alkansi ang Kandaya nga milukat og ticket sa Final 4 human gipalagpot ang Bai Hotel, 71-56.
Si Ariel Lepiten maoy nangu sa Kandaya uban ang 11 puntos ug tulo ka rebounds.
Sa ubang resulta, ang Seda Central Bloc ug JPark milampornas sa ilang mga kontra aron pagligid ngadto sa semis.
Ang Seda milampaso sa Belmont Hotel, 90-55, samtang ang JPark mikastigo sa Diamond Suites and Residences, 89-65.
Si Adrian Padilla mipupo og 18 puntos, pito ka rebounds, upat ka assists, ug tulo ka steals alang sa Seda, samtang si James Llenes mipabuto og 27 puntos nga iyang gipalamanan og usa ka rebound, lima ka assists, ug tulo ka steals alang sa JPark.