CEBU, Philippines — Human mapakyas sa miagi nilang duwa, ang Boston Celtics mosuway na sab paglansang og NBA rekord. Ning higayona didto sa ilang korte.
Ug andam na kaayo ang Celtics nga mo-host sa Dallas Mavericks sa Game 5 sa NBA Finals nga gikatakda sa alas 8:30 sa buntag karong adlawa (Martes, Hunyo 18 oras dinhi sa Pilipinas) didto sa TD Garden sa Boston, Massachusetts.
Gisagunsonan og pilde sa Celtics ang Mavs sa nag-unang tulo ka duwa sa serye. Nanginahanglan sila og usa na lang ka daog aron mosuwat og kasaysayan isip labing daogan nga koponan sa NBA uban ang 18 ka kampiyonato.
Nadelatar ang koronasyon sa Celtics human sila gimasaker sa Mavs, 122-84, sa Game 4 niadtong Sabado.
Hayag pa hinoon gihapon kaayo ang tsansa sa Celtics gumikan kay sukad masukad, wala pa team nga nakabangon human maunhi og 3-0 sa usa ka best-of-seven series.
Atubangan sa ilang fans, ang Celtics nagpanikad nga pakamangon sa hingpit ang Mavs ug kab-oton ang gihandum nilang dungog.