CEBU, Philippines — Ang labing unang NBA player nga nagpositibo sa coronavirus nga si Rudy Gobert ug ang tanang players ug staff sa Utah Jazz hingpit nang luwas sa maong makalisang nga sakit.
Mao kini ang gideklarar sa Utah Department of Health kagahapong adlawa.
Kahinumduman, nga ang pagka-positibo ni Gobert sa COVID-19 maoy hinungdan sa pagkasuspenso sa NBA sa kasamtangan niining season niadto Marso 11.
Sunod adlaw, ang iyang teammate nga si Donovan Mitchell nagpositibo sab.
Matud pa sa health department sa Utah nga nakumpleto sa Jazz players ug staff ang 14 ka adlaw nilang quarantine ug dili na sila risgo nga makapakatap sa impeksiyon ngadto sa uban.
Ang Jazz players ug staff padayon hinuon nga mag-obserbar sa social distancing ug ingon man limitahan ang ilang mga lihok agi'g pagsunod sa lagda sa NBA ug sa US Centers for Disease Control and Prevention.
Ang maayong balita sa Jazz naabot usa ka adlaw human si Christian Wood sa Detroit Pistons gideklarar nga hingpit na sab nga naayo sa maong sakit.