CEBU, Philippines — Si Utah Jazz star Rudy Gobert, nga nangayo og pasaylo sa dili maayo niyang binuhatan sa wala pa mag-positibo sa coronavirus, misaad nga mo-donar og $500,000 alang sa serbisyong panglawas ug ingon man sa mga trabahante sa arena nga apektado ning COVID-19 pandemic.
Kapin sa katunga sa maong kantidad igahin alang sa COVID-19 social service programs didto sa Utah, Oklahoma City ug French health care system, sigun pa sa opisyal nga pamahayag sa Jazz.
“These donations are a small token that reflect my appreciation and support for all those impacted and are the first of many steps I will take to try and make a positive difference, while continuing to learn more about COVID-19 and educate others,” matud pa ni Gobert.
Motunol si Gobert og $200,000 nga hinabang ngadto sa mga part-time nga empleyado sa Jazz arena nga dili makatrabaho gumikan sa pagka-suspenso sa kasamtangang NBA season.
Laing $200,000 ang itagana ni Gobert alang sa mga pamilya nga naapektuhan sa outbreak didto sa Utah ug Oklahoma City samtang $111,400 iyang itampo alang sa health care didto sa France, ang yuta niyang natawhan.
Si Gobert maoy labing unang NBA player nga nag-positibo sa COVID-9.