CEBU, Philippines — Ang NBA dili mopahamtang og silot, multa man o suspensiyon ngadto ni Utah Jazz big man Rudy Gobert gumikan sa mga aksiyon niini nga dili makiangayon sa wala pa mag-positibo sa coronavirus, sEgun pa sa taho sa Yahoo Sports.
Si Gobert nagbugal-bugal kabahin sa mga palisiya sa liga sa wala pa siya mag-positibo sa COVID-19 nga maoy nakapaaghat sa NBA pagsuspenso sa kasamtangan niining season sa dili momenos 30 ka adlaw.
Niadtong Martes, gihikap ni Gobert ang tanang mikropono ug recording equipment sa media atol sa usa ka press conference.
Padayon siyang nakig-apir sa iyang mga teammates ug gipanghilabtan niya ang ilang mga butang didto sa ilang locker room.
Duha ka adlaw ang milabay, nag-positibo si Gobert sa makalisang nga virus.
Nangayo na hinuon si Gobert og pasaylo sa dili maayo niyang binuhatan.
Sa laing bahin, usa ka estudyante sa elementarya didto sa Rhode Island ang nag-positibo sab sa coronavirus human nakapaduol sa mga players sa Utah Jazz sa ilang duwa niadtong Marso 7.