CEBU, Philippines – Daw dili kadawat sa ilang kapildihan si Kazakhstan head coach Renatas Kurilionakas, kinsa mipasangil nga gipaboran ang Gilas Pilipinas sa mga reperi hinungdan nga napilde sila sa krusyal nga duwa sa final leg sa FIBA World Cup qualifiers.
Si Kurilionakas nagkanayon nga gipangandaman nila og maayo ang Gilas kay nakita nila nga gustong mobawos ang mga Pinoy kanila nga mipilde kanila sa una nilang sangka niadtong Nobiyembre sa miaging tuig didto sa MOA Arena.
"Anyone who understands basketball knows what happened in the game," matud pa ni Kurilionakas sa FIBA.com.
Apan ang batid sa basketbol wala makumbinser sa pamahayag ni Kurlionakas ilabi na nga gilubong iyang koponan og 18 puntos, 75-93.
Nakita usab sa game stats nga mas daghan ang tawag batok sa Gilas itandi sa Kazakhstan. Timaan niini mao ang sayo nga 'foul trouble' ni Andray Blatche batok sa Kazakhstan.