CEBU, Philippines - Ang national finals sa Milo Marathon karong tuiga mipaduol og maayo sa Sugbu gumikan kay ang mga nag-organisa sa maong karera mitudlo man sa dakbayan sa Iloilo isip host karong Disyembre 4.
Mao kini ang labing unang higayon sa 40 ka tuig nga kasaysayan sa labing karaan nga marathon sa nasud nga ang national finals mahitabo dinhi sa Visayas region.
Sa miaging tuig, ang final battle didto gipahigayon sa Angeles City, nga mao say labing unang higayon nga ang maong event gipadagan gawas sa Metro Manila.
Sa ika-40 niining edisyon, 13 ka legs ang kumbatihan nga mosikad karong Hulyo 17 didto sa Dagupan.
Ang Cebu leg gikatakda karong Septiyembre 25. Ang laing dapit sa Visayas nga mo-host og qualifying leg mao ang Tagbilaran karong Septiyembre 18 ug Dumaguete karong Oktubre 9.
Human sa Dagupan, ang aksiyon didto sa Luzon mobalhin sa Tarlac karong Hulyo 24, Metro Manila (Hulyo 31), Batangas (Agosto 7), Lucena (Agosto 14) ug Naga (Agosto 28).
Samtang ang lumba sa Mindanao mahitabo didto sa Davao (Oktubre 9), General Santos (Oktubre 16), Cagayan de Oro (Oktubre 23) ug Butuan (Oktubre 30).
Gawas sa Milo Marathon, ang Iloilo mao sab ang mo- host sa Visayas regional championships sa Milo Little Olympics karong Septiyembre 9-11. (BANAT SPORTS)