CEBU, Philippines - Miagi pa og double overtime ang Salera Const. una nila maugkat ang dangog nga kadaugan batok sa Mecu Admin, 63-62 sa pagbalik sa aksiyon sa King’s Properties Inter-Contractor Basketball Tournament niadtong Biyernes sa gabii didto sa Guadalupe Sports Complex.
Sayo untang makuha sa Salera Const. ang daog dihang milabaw sila og dos puntos sa himalatyong segundos sa regulasyon, apan napatabla kini ni Crispin Morano nga mihatod sa duwa sa first overtime.
Sa dugang singko minutos, dumadaog sab unta ang Salera Const., sa daginutong segundos sa duwa, apan ang Mecu Admin nakatabla na sab sa iskor hinungdan sa ikaduhang overtime.
Naglami ang duwa diin nagsinukliay sa ilang mga puntos ang duha ka kampo hangtod nga nasakmit gyud sa Salera Const. ang kutas nga kadaugan.
Si Nonoy Gopion milansang og 20 puntos aron pangulohan ang Salera Const., gisundan ni Ganggang nga miabuno’g 13 puntos.
Gipangulohan sab ni Crispin Morano ang Mecu Admin pinaagi sa iyang 15 puntos.
Sa pasiunang duwa, ang Mecu Fire Prop miiskor sab og daog batok sa RNM, 57-50 sa pagpangulo ni Bryan Montalban, kinsa miposa’g 27 puntos.
Tulo ka players ang mihimo’g double figures alang sa RNM sa pagpangulo ni Nestor Abao sa iyang 15 puntos. Si Paul Magadan miamot og 12 puntos ug si Rubico Macario mitampo’g 10 puntos.
Sa laing aksiyon, midaog sab ang King’s Properties pinaagi sa paglubong sa Vineyard, 54-44.
Si James Cabardo mao lang ang miiskor og double digits alang sa King’s Properties sa iyang 10 puntos, apan nakakuha siya og maayong suporta gikan sa iyang kaubanan.
Ang Vineyard gipangulohan ni Niño Calderon pinaagi sa iyang 11 puntos, samtang sila si Bernie Lazarte ug Cedric Gimena mitimang og 10 puntos matag usa.
Ang liga giorganisar ni Engr. Fritz Canono inabagan ni Tim Adlawan. Ang mga duwa gipadagan ni league commissioner Marjorie Martinez ug technical committee Edwin Dejacto Sr.
PUNTOS MATAG USA
Unang duwa:
MECU FIRE PRO (57) – Montalban 27, Miroy 7, Laguzado 7, Salgado 6, Tarnate 4, Babor 3, Resterio 3.
RNM (50) – Abao 15, Magadan 12, Nacario 10, Toledo 5, Maratas 4, Caballes 2, Pasculado 2.
Ikaduhang duwa:
KING’S PROPERTIES (54) Cabardo 10, Mirasol 9, Mirez 8, Bacala 6, Payo 6, Zulueta 4, Adlawan 3, Sepio 2, Rosaluna 2, Mellomida 2, Vasquez 2.
VINEYARD (44) – Calderon 11, Lazarte 10, Gimena 10, Bayawa 6, Uy 4, Alcontin 3.
Ikatulong duwa:
SALERA CONST. (63) – Gopion 20, Ganggang 13, Salloman 6, Zapanta 5, Bolo 4, Peralta 4, Mondragon 4, Novabos 3, Siao 2, Zerrodo 2.
MECU ADMIN (62) – Morano 15, Tagadiad 9, Taglinao 8, Cimafranca 6, Mapili 5, Jabiniao 5, Lopez 4, Verdon 4, Bongo 3, Morano 3.