CEBU, Philippines – Lain na sab nga kickboxing ug mixed martial arts action ang masaksihan sa ipahigayong “Bakbakan sa Sugbo” karong adlawa diha sa Cebu City Sports Institute sa Barangay San Nicolas, ning siyudad.
Ang binuwan nga combat grassroots program nga hiniusang proyekto sa Cebu City Sports Commission ug Yaw-Yan ArDigma Cebu Martial Arts Inc., gisugdan sa miaging tuig isip paghatag og lingaw sa mga Sugbuanon ug sa susamang paagi pagpangita og mga potensyal nga atleta.
Sa main event sa Muay Thai kickboxing, ang veteran nga si Dodong ‘Tiger’ Jagape sa Bohol Top Team makigharong ni Dan Cotejo sa Team Bagwis-Mandaue City.
Moaway sa supporting bout mao ang teammate ni Cotejo nga si Darrel ‘K9’ Dabon batok ni Sif ‘Axe’ Badio sa United MMA.
Samtang sa MMA, ang batan-ong si Josh ‘Buffalo’ Ybañez sa Yaw-Yan ArDigma makigsangka ni Durex Dragon KBC fighter Benedict ‘Little Warrior’ Torbiso.
Pito pa ka paresan sa mga kickboxers ug MMA fighters ang moaway sa undercards. (BANAT NEWS)