CEBU, Philippines – Gidominar sa University of Cebu (UC) jins ang tanang kategoriya sa bag-o lang natapos nga 2014 edition sa Philippine Taekwondo League (PTL)-Cebu didto sa SM Consolacion.
Ang UC miharos sa tanang medalya sa men’s senior division ug sa women’s junior division.
Ang Indiana Aerospace University ug ang University of San Carlos parehong midaog og bronze sa senior men ug junior girls.
Sa junior boys, ang UC mipukan sa USC, samtang ang Southwestern University ug ang Holy Name University nidaog og bronze matag usa sa tag-team type event.
Ang UC jins ni coach Michael Realista misakmit sa ilang ikaupat nga bulawan gikan sa cadet division batok sa SWU, samtang ang USC ug San Roque Child Development School adunay bronze matag usa.
Si Princess Maegan Parba, kinsa ubos sa UC team B maoy best female of the tournament, samtang laing pambato sa UC nga si Sal Luiji Estrada maoy best male player.
Matud pa ni tournament director Avenger Alob, ang UC Team B nakadawat sab og award isip Most Outstanding team. (BANAT NEWS)