CEBU, Philippines - Opisyal na nga gipagawas ang starters sa Western ug Eastern All-Star squad nga moduwa sa tinuig nga NBA All-Star Game karong Pebrero 16 didto sa New Orleans.
Human sa dul-an usa ka buwan nga online votation, nahagpat na ang 10 ka mga NBA superstars nga moduwa alang sa tagsa-tagsa nila ka dibisyon.
Sa taho sa NBA.com, upat ka players ang moduwa sa labing una nilang All-Star Games isip starters ug kini naglakip nilang Stephen Curry sa Golden State Warriors ug Kevin Love sa Minnesota Timberwolves alang sa West ug Paul George sa Indiana Pacers ug Kyrie Irving sa Cleveland Cavaliers alang sa East.
Gawas sa upat ka mga bag-ong All-Star starters, mimugna usab og kahibung alang sa mga fans ang wala paglakip ni Houston Rockets center Dwight Howard sa starting team sa West. Si Howard naapsan sa botos ni Love.
Sa iyang bahin, si Los Angeles Lakers star Kobe Bryant kinsa mihangyo sa mga fans nga dili una siya ibotar sa All-Star nahimo gihapong starter uban nila ni Los Angeles Clippers forward Blake Griffin ug Kevin Durant sa Oklahoma City Thunder.
Uban nila ni George ug Irving sa East Team mao sila si reigning MVP LeBron James ug Dwyane Wade sa Miami Heat ug New York Knicks star Carmelo Anthony.