Ugmang adlawa, Nobiyembre 15, 2026 pormal nga magsugod ang 49th Association of Southeast Asian Nations (ASEAN) Summit and Related Summits nga mahitabo didto sa Manila.
Gipaabot nga motambong sa summit ang nagkadaiyang mga lider sa tanang miyembro sa ASEAN ug mga lider sab sa mga partner countries sama sa US, Australia, Japan, South Korea, France ug uban pa.
Tungatunga aning preparasyon, gikwestyon sa mga kritiko sa administrasyon ang gidak-on sa gastos sa pundo para niini nga niabot og P22.9 bilyones, apil sa gigastohan sa budget mao ang pagpanindot sa palibot sa venues ug pagpaayo sa mga edipisyo diin himuon ang tigom sa mga lider ug delegado.
Apan para sa mga kritiko, nagusik-usik lang daw ang gobiyerno sa pundo sa katawhan para taguon ang tinuoray nga dagway sa kapobrehon dinhi sa nasud.
Samtang dunay punto ang mga kritiko ani, pero dili ba ngil-ad pud tan-awon nga sugaton og dili maayong talan-awon ang mga bisita ini og abot nila diri sa atong nasud.
Sama sa mga panimalay, kun mangimbitar og bisita dili ba normal lang pud nga manglimpyo sa palibot ug paninduton ang balay ug tugkaran para pud walay bati nga ikasulti ang bisita?
Ang ASEAN Summit mahitabo lamang dinhi matag napulo ka tuig kay puli-puli man ang mga miyembrong nasud nga maoy mahimong chairman. Lain pud kaayo tingali tan-awon nga human sa napulo ka tuig ini’g balik og host nato wala gyuy nakitang bag-o , nindot o improvement ang Pilipinas?
Gawas pa ana, unsaon man kaha pag-engganyo o maganahan ang mga bisita ilabi na kadtong mga delegado sa mga negosyante gikan sa lain-laing nasud para mamuhonan dinhi sa Pilipinas kung pag-abot nila dili nagkamuritsing ang kadalanan, guba ang mga edipisyo ug dili haom sa ilang negosyo?
Gidepensahan sa Malacañang ang maong budget nga matud pa nila kaya nilang mapamatud-an kun sa gigamit ang matag piso niini. Sayon ra kaayo ni, basta naay resibong mapakita ug kung sa gikinahanglanon gyud kini gigamit ang kwarta.
Dili tingali maayong karon kini kwestyunon, paabota nalang ini og mahuman ang ASEAN Summit, anha na paninglon ang mga resibo.