Sunod buwan pasko na gyud. Ingon sa nabatasan akong gisuwayan og tagik ang mamahimong Christmas Station ID alang sa among parokya dinhi sa Buanoy, Balamban. Sanglit ang tema sunod tuig mao man ang "Welcoming Church" atong gisuwayan og haom kini pinaagi sa ulohan: Dayon Kamo
DAYON KAMO
Daghan man ang pagsulay
Pabilin sa paglahutay
Isip kristohanong banay
Kitang tanan magdinasigay
Koro
Dayon mga anak sa atong Parokya
Bukas ang mga ganghaan Mag-ambahan kita
Sa pagsugat sa Mesiya!
Himaya sa Dios sa Dios sa Kahitas-an!
Managlahi man ang atong kagikan
Nagkadaiya man ang atong sugilanon
Apan kabahin kita sa mao rang katilingban
Ang Emanuel atong dawaton! (koro)
Bisan sa kalisud ayaw wad-a ang talidhay
Mogaan kini kun anaa ang pagtinabangay
Hiniklin ang panaglahi kita magsandurot
Aron ang batang Jesus Mahimuot! (koro)
Panapus
Ihalad ta ang atong kaugalingon
Uban ni San Vicente Ferrer atong Patron
Ning Pasko nga makahuloganon
Abli ug mahinangpon alang sa ‘tong mga igsuon!
Ang Simbahan usa ka Inahan nga andam mohangop sa iyang mga anak labina kadtong anaa sa kinasuokang bahin sa parokya.