Gimando sa Malakanyang ang paghimo sa 50 ka kilometrong kurtina nga isalimbong sa mga dalan nga maagian sa mga delegado gikan sa mga nasud nga motambong sa Asean Summit aron dili makita ang mga barong-barong sa mga igsoon natong kabus nga dili maayo nga tanawon sa mga mata sa atong mga bisita.
Giawhag usab sa Malakanyang ang mga rallyista nga dili mohimo sa ilang mga protesta sa mga adlaw nga gipahigayon ang Asean Summit.
Sa atong kultura naandan na nga manglimpiyo gyod ta sa atong mga panimalay kun adunay mga okasyon nga diin aduna kitay mga bisita. Ang mga hugaw ato nga limpiyohan ug panghipuson anf mga nagkatag lang nga mga butang. Ang mga nuog atong pangtagoan sa mga sibay aron dili makita sa mga mata sa atong mga bisita. Ang mga guba sa atong mga panimalay atong pang ayohon ug ang dili na madala og ayo ilisan kun adunay salapi nga ikapalit og iilis. Dili pod kita gusto nga mabalda ug mabalaka ang atong mga bisita samtang anaa sila sa atoa nagbisita.
Mao ni ang gusto nga ipakita kanato ni Presidente Bongbong Marcos Jr. ug sa Malakanyang.
Bisan tuod ang mando sa Presidente ug Malakanyang maingon nato nga kabahin sa atong kultura pero dili pud nato ikalimod nga usa kini ka buhi nga kamatuoran nga gikauwaw sa gobyerno sa nasud ang dagway sa kabus niining katawhan. Nagpakaaron-ingnon ang gobiyerno. Aw hinuon kabahin napod sa kulturang Pilipinhon ang pagka tigpakaaron-ingnon.
Gikauwaw sa gobiyerno ang kabus niining katawhan. Nalimot siya nga ang iyang gikauwaw mao ang iyang gihimong gatasan aron mahimo siyang adunahan. Gipahimuslan sa mga nagpadagan sa gobyerno ang ilang katungdanan aron maadunahan samtang ang mga kabus ilutan lang og ayuda aron kanunay kining maghangad ngadto kanila.
Gikauwaw sa mga nagdala sa renda sa gobyerno ang mga kabus. Apan dili sila gusto nga moasenso ang pagkabutang sa mga kabus kay dili sila gusto nga mawagtangan og puhonan sa politika. Sa Pilipinas, investment sa mga politiko ang mga pobre. Mao kini ang hinungdan mganong walay gobyerno nga naningkamot sa pagpaasenso sa kahimtang sa mga kabus, hinuon iya pa kining gipalapdan ug gipadaghan. Maut ang mga politiko maong maut pod ang gobyerno. Amboooot laaaannnng.