Nakahilak sa kalipay ang chairperson sa House Committee on Appropriation nga si Kongresista Mika Suansing human naaprobahan sa ikaduhang pagbasa ang 7.2 trilyones ka pesos nga budget alang sa National Expenditures Program. Dako gyod kaayo ang kalipay sa kongresista kay nakahilak god siya.
Pero kun unsa ka dako ang kalipay ni Kongresista Suansing mao pod ka dako ug seguro mas labaw pa niini ang kaguol sa mga Philhealth beneficiares tungod sa paglaslas sa mga kongresista sa budget alang sa ilang mga benepisyo.
Ania ang asoy. Ang Philhealth misumitir sa budget proposal niini nga nagkantidad og 244 bilyones ka pesos alang sa tuig 2027. Apan 74 bilyones ka pesos lamang ang giaprobahan sa komitiba ni Suansing. Sa 244 bilyones ka pesos gilaslas gikan niini ang 170 bilyones ka pesos. Sa 170 bilyones ka pesos nga gilaslas ang 25 bilyones niini gidugang nila ngadto sa 24 bilyones ka pesos nga pundo alang sa Medical Assistance for Indigent and Financially Incapacitated Patients o MAIFIP nga ila nang gihimo nga 49 bilyones ka pesos.
Ang Healthcare Professional Alliance After Covid-19 miingon nga ang 74 bilyones ka pesos nga budget sa Philhealth alang sa tuig 2027 kutob lamang kini sa buwan sa Marso. Human sa buwan sa Marso wala nay budget ang Philhealth. Sa kuwentada sa Healthcare Professional Alliance After Covid-19 ang Philhealth nanginahanglan gani unta og 376.7 bilyones nga budget alang sa tuig 2027 aron ma-cover ang mga bagong binipisyo sa mga miyembro niini. Apan ina kay padakan ang budget gilaslasan hinuon kini sa kongreso.
Ang Alliance mi-demand sa pagpagawas dayon sa 133.2 bilyones ka pesos nga share sa Philhealth gikan sa nakolekta nga Sin tax gikan sa tuig 2023-2027 nga wala pa magasto ingon man sa 85 bilyones ka pesos nga wala pa magasto nga earmark gikan sa PAGCOR ug PCSO.
Kun nakahilak sa kalipay si Kongresista Suansing mitiyabaw usab sa kasakit ang binipisyaryo sa Philhealth tungod sa ka gamay sa budget nga gigahin sa mga kongresista ngadto Philhealth.