Naa nasay hulga sa African Swine Fever sa mga baboyan dinhi sa Central Visayas human na-detect ang maong sakit sa mga baboyan sa usa ka lungsod didto sa Negros Occidental. Kapin us aka libong binuhing baboy ang nangamatay sa lungsod sa San Enrique.
Kung mahinumdoman pipila ka tuig na ang nakalabay sa dihang naigo sab og susamang sakit sa mga baboy ang probinsya sa Sugbu.
Nahagba gyud ang industriya sa baboyan dinhi tungod kay gidid-an ang mga hog raisers nga makabaligya sa ilang mga baboy ug produktong karneng baboy paggawas sa isla.
Ang kaniadto sikat nga mga pork meat products sama sa chorizo, litson, chicharon ug uban pa tugoting makagawas sa Sugbu.
Gani bisan ang bawong humba o adobong baboy sa mga biyahidor gikan sa Sugbu padulong sa laing probinsya gidid-an madala sa mga barko ug sa abyon.
Karon gipangulbaan na sab ang P15 bilyones nga industriya sa mga namuhi og baboy dinhi sa Sugbu tungod aning nahitabo sa Negros Occidental.
Kay bisan og daghang namuhi dinhi og mga baboy, tigkuhaan sab og buhing mga baboy ang mga negosyante dinhi gikan sa Negros.
Husto kining gibuhat ni Gov. Pamela Baricuatro nga sayo palang daan nagpagawas na siya og executive order para pahugtan ang border control sa tibuok probinsya para dili masubladn og pinalusot nga mga baboy gikan sa maong probinsya.
Gikinahanglan kining livestock border control tungod kay dili kalikayan nga naa gyuy mga komprador og baboy nga mosuway gyud og risgo pagpalusot niini dinhi sa Sugbu tungod sa kwarta bahala pa og magdala og sakit nga ASF ang ilang kinomprang baboy o pork products gikan didto s Negros padung dinhi.
Dili lang unta magpalabi kahakog ang ubang mga negosyante og baboy nga moresulta sa pagkaamong sa ubang mga baboyan nga wala pa maigo og ASF.