Tulo ka matud pa barangay sa Cebu City ang nakwestyon karon kun giunsa nila paggasto ang ilang budget. Nahibaw-an kini atol sa paghimo og kwentada sa Commission on Audit sa ilang mga nagasto, kun unsa ilang gigamitan sa pundo ug kun pila nalay nahibilin niini.
Ang mga nakwestyon nga mga barangay ug gipatawag sa konseho sa Cebu City aron paesplikahon mao ang Barangay Lahug, Basak Pardo ug Lorega-San Miguel.
Bisan tuod og barangay ra, milyones ka pesos ang kwarta nga nalambigit nga nakita sa COA findings nga may iregularidad sama sa mga disbursements, cash aids nga unta para sa mga benepisaryong mga konstituwente, cash advances ug uban pa.
Kinahanglan gyud magtakdo ang ilang mga resibo ug rekord nga kinahanglang ilang isumitir sa COA , kay kun dili gani, makwestyon ang mga kasamtangang opisyales ug posible pa silang makasohan ug pagpangawkaw.
Hinuon basin og duna gyud silay balidong eksplinasyon niini o ba kaha nataligam-an lang nga mga dokumento nga angay untang isumitir.
Apan bisan pa niini dili gyud kalikayan nga dunay magduda sa kaligdong sa mga nanglingkod nga opisyales.
Ilabi na nga naay mga oposisyon nga nagpaabot lang nga makabentaha kun masipyat ang mga naglingkod. Dako kining isyu sa barangay.
Gawas sa tulo, posibleng duna pay ubang mga barangay dili lang sa Cebu City ang dunay kwestyonableng paggamit sa pundo sa gobiyerno.
Ang barangay maoy giisip nga “nucleus” sa local government o kinagamayan nga buhatan sa gobiyerno diha sa lokalidad. Diha tanan magsugod ang panggobiyerno.
Busa, kinahanglang magmatngon ang mga kasamtangang naglingkod sa pwesto diha sa barangay, apil na ang ilang barangay staff kun unsa kadako ang kaakohan nga ilang gisudlan.