Dili tanan hingpit. Dunay apan. Ako gani mismo dunay apan. Hinuon wala kini magpasabot nga wala lang g’yud tay mahimo kalabot niini ug labaw na nga wala kini magpasabot nga wala tay mahimong maayo o kaayohan ngadto sa uban. Ang tanan dunay mahimo kun pilion lamang nga dunay kaayohan nga himoon.
Hinumdomi ang tanan desisyon ug matag desisyon maoy mosulti kun unsang matanga kita sa pagkatawo. Busa:
1. Angayan natong batonan ang awareness kun kaamgohan kun unsa ug kinsa kita sa atubangan sa tanan ug sa kalibutan. Ang paghangop sa atong kahuyangan maoy magsilbing sinugdanan sa atong panlimbasog alang sa mas matuod ng akita.
2. Ang kahuyangan bisan atong giangkon dili man pud atong excuse aron dili lang pud ta molihok. Kinahanglang adunay output ang pagpaningkamot dili lang alang nato kondili alang usab sa uban.
3. Ang kaugalingong kahuyangan dili usab babag aron kita mohukngay kun mohukom sa bisan unsang kahiwian nga magdala og kalaglagan sa kinatibuk-an dagway sa atong katilingban. Kinahanglang manlimbasog kita aron dili mapagan ang mga inosente.
4. Ang kahuyangan dili pud excuse aron dili na lang gyud nato i-correct ang atong kaugalingon. Aduna kitay mga personal nga sayop ug personal nga tulubagon ngadto sa Dios.
5. Ang kahuyangan nga dili angkonon wala man makapalig-on sa tawong hingtungdan. Dili siya moangkon? Mao nga dili makiangayon nga siya mangangkon sa suporta kanila nga iyang gituohan nga maoy makalambo niya.
Apan padayon kitang mopakgang sa mga sayop samtang atong gidisiplina ang atong kaugalingong kahuyangan. Ning paagiha mamahimong mas makahuloganon alang kanato ang gitawag natong pagbasol.