Dili gyud diay angayan ibalewala ang atong panglawas. Tinuod gyud ang giingon nila nga “Heath is Weath” kay base sa akong kasinatian importante gyud kaayo nga atimanon nato ang atong kaugalingong lawas.
Bag-o lang migawas ang resulta sa among annual physical exam sa company diin naalarma ko sa resulta kay taas ang akong sugar nga anaa na sa baba sa diabetes, simbako lang dili unta gyud madayonan.
Wala usab kaabot sa normal ang rate sa akong heart beat, hinoon usahay ra kuno pero gikinahanglan nga mokonsulta pa og cardio specialist.
Ang akong blood pressure normal ra man kay naa naman koy maintenance medicine. Five years ago pa hypertensive na kong daan pero tungod lagi kay naay tambal nga gi-maintain magpatuyang gihapon sa mga gakaonon.
Ang ingon niini nga kondisyon ang naghatag kanako og tinuod nga wake up call nga gikinahanglan na gyud seryosohon ang pag-amping sa akong kaugalingon kay gagmay pa ra ba ang akong mga anak.
Gipaambit nako ni nga kasinatian kay nasayod ko nga daghan ang maka-relate niini nga sama nako gahi og ulo magpatuyang lang og habhab og pagkaon ug dili pa gyud mag exercise.
Tambag sa akong higalang doktor nga matngonan na akong pagkaon, likayan na ang mga mantikaon, parat ug tam-is nga pagkaon, kong dili man kalikayan pwede man pero ginagmay nalang tilaw tilaw nalang.
Pastilan sayon ra estoryahon pero lisod kaayo buhaton, maghunahuna pa lang ko daan sa rice maglaway na ko ilabi na paresan og humba lata nga naa pa gyuy ginamos o buwad, mao gyud ni akong pqborito.
Struggle kaayo nako karon ang pagkontrol sa gana sa pagkaon kay mora’g tintalon man gyud ko kay ang akong huna huna naa ra man sa kaldero kay gusto lagi mokaon.
Ang pagpasingot lisod usab kay mangita og katarongan ang lawas nga kapoy kaayo kong momata og sayo aron mag-exercise.
Lisod man seguro sa sinugdanan apan mahimo nako ni sa kadugayan, walay laing kapilian kon dili ang paghimong himsog ug baskog nga panglawas.
Dili pa seguro ulahi ang tanan nga higugmaon nato ang atong kaugalingon labaw sa tanan, ikaduha sa Ginoo. Kay kong paundayonan nato ang ayong gana sa pagkaon ug ang katapolan sa pag-exercise aw kahibalo ba kita asa ang padulngan.