Maayong patagmon kining mga tawong magpataka og post sa social media og mga fake news ilabi na kun kini magbunga og kalisang ug kabalaka sa katawhan.
Kay samtang sila nalingaw sa ilang gi-post nakahatag sila og problema sa uban ug labaw sa tanan usa kini ka matang sa pagpang-terorismo kay nagpakatap kini og kahadlok.
Husto ang plano sa Danao City Police Station nga pasakaan og kasong paglapas sa Anti-Cybercrime Law ang 21 anyos nga tinun-an sa kolehiyo nga giingong maoy nagpakatap og fake news bahin sa suway nga pagdagit kaniya sa mga kalalakin-an.
Sa pagkatinuod diay, dihang giadto siya sa kapolisan miangkon kining iyaha lang kadtong gihimo-himo, sakay-sakay sa lain sab nga mga fake news diha sa social media bahin anang mangdagit ug manguha og ‘internal organs.’
Ambot nganong motuo man sab ning mga tawo karon bisan og ang post gikan sa di lehitimong media outlets. Lisud tudloan ang publiko kung sila dili gustong magpatudlo ug di gustong masaway ilang hiwi nga kinaiya.
Lisud pasabton ang tawong di gyud gustong mosabot sa sitwasyon kay nag-enjoy sila sa ilang gibuhat nga dunay mga tawong nag-antos o nabalaka sa ilang pagmagahi bisan nalang unta og gamay nga pagpakabana.
Karon magsilbi untang leksyon sa uban kining nahitabo sa maong batan-on. Mao bitaw nga duna gyuy pasidaan alang sa mga netizens nga “think first before you click.”
Sa ubang mga batan-on o mga netizens diha nga nagtuong maayong laki na paggamit sa internet, hala patuyang lang sa pagpataka og pakatap og fake news o pagpangdaut sa inyong isi’g kaingon.
Kay bulahan ugma damlag, kamo nay mabalita nga napriso. Apan ning tungora di na fake news ang mogawas kay ibalita man mo sa mga lehitimong news outlets.