Nakonpirmar na gyud nga mibalik na ang daghang illegal gambling sa lainlaing kabarangayan dinhi sa dakbayan sa Sugbo. Sa among pagkontakay ni Cebu City Police Office (CCPO) Director Joel Doria, iyang gipasalig nga himoan dayon kini og operations.
Gikontak nako si Col. Doria human nga ang inpormer nako sa Barangay Tejero miari gyud sa opisina ug mipahibalo nga namalik na usab ang mga video karera ug moli-moli sa ilang dapit, ilabi na sa likud nga bahin sa karaang Cebu Provincial Jail, lahos na ngadto sa likud sa Liberty Hardware.
Gusto mo og sampol? Kamong mga polis diha sa Waterfront Police Station nga nagkiyugpos lang ug ang uban ninyo mag-anhaan pa sa balay nga gibutangan sa mga video karera ug moli-moli, dili ba tinuod nga dunay mga illegal gambling machines sa balay nilang Joy, Naadat ug uban pa?
Dili na lang usa nako ibatbat dinhi ang uban kay direkta ko na kining ihatag sa mga kasaligang kapolisan. Bag-o man diay ang hepe sa Waterfront Police Station, pahimoi og pakisusi kini Sir, kay basin og gibuang ka lang sa pipila nimo ka sakop.
Kon dili gani nimo maaksiyonan kining daghang illegal gambling machines sa imong area sa Tejero, magduda na ko nimo. Diha sa Sitio Ponce 2, may mga karera sab diha nga gi-operate. Mga polis susiha sa ilang Elna, Marilou ug Ludy. Ang amigo nako nga kandidato sa barangay mikonpirmar gyud nga may nag-operate nga karera sa ilang dapit.
Ambot sa Barangay San Roque kay wala pa mo-report ang akong tigpaniid. Apan sa Barangay Suba ug Barangay Pasil, konpirmado nga midagsang na usab ang mga video karera.
Wala usab kini mahimoi og operation sa kapolisan nga nadestino sa Sawang Calero Police Station, ang Station 6 sa CCPO. Tan-awa ang balay nilang Dodo diha sa Belgium Street duol sa Anit Store. Naa pa’y mga pushers nga maoy mamaligya og drugas sa mga magduwa og video karera. Ambot nganong wala gyud ni pahimoi og hugot nga kampanya sa mayor nga ubos unta sa balaod, Republic Act 8551, klaro man kaayo nga ang paghimo’g kampanya batok sa ilegal nga mga sugal ubos man sa pagsuperbisar sa mayor.
Mahimong wala masayod niini si Mayor Tomas Osmeña mao nga giyahan nato ang iyang mga alalay nga masayod niini, aron matambagan nila ang mayor sa angay niya nga pagabuhaton.
Sus, maghisgot pa man unta kita sa gipasagdan nga illegal swertres operations nga gi-operate sa mga kapitan sa barangay, apan nahutdan na kita sa luna. Sa sunod na lang.