Nakita gyud sa mga delegado sa Asia Pacific Economic Cooperation (APEC) sa bag-ohay lang gihimong transportation ministerial meetings ang problema sa trapiko dinhi sa Sugbo.
Samtang di maayo ang ilang obserbasyon angay isipong maayo kini nga pagsaway tungod kay pagpukaw kini dili lang sa mga anaa sa gobiyerno kondili hasta sa publiko.
Ang gobiyerno nagtinguhang masulbad kining problemaha pinaagi sa pagpatuman og nagkadaiyang mga programa ug inisyatiba.
Kini naglakip sa mga public-private partnerships (PPP) ug build-operate-transfer (BOT) schemes, aron dili makagastos og dako ang gobiyerno sa pagpalambo sa sektor sa transportasyon.
Sa PPP, ang private sector sama sa mga negosyante moabag sa pagpangita og solusyon sa problema nga gisagubang sa gobiyerno aron mahatud ang serbisyo sa publiko, usa na niini ang problema sa transportasyon.
Ang paghatag og prangkisa sa gobiyerno sa mga pasaheroan maisip na nga PPP. Nabuhi ang mga drayber ug operators niini ug sa samang higayon nakatabang sila sa gobiyerno aron dunay masakyan ang publiko.
Sa BOT, ang private sector maoy mogasto aron masulbad ang mga kakuwangon sa gobiyerno sama sa transportasyon, panglawas, pagtuon ug panukiduki, enerhiya, food security ug uban pa.
Aron sila makabawi, sila maoy modumala sa mga pasilidad sud sa pipila ka tuig base sa kontrata.
Apan daghang mga progresibong grupo ug transport groups ang misupak niini kay sa ilang pagsabot 'privatization' na kini sa transport sector.
Nahadlok usab sila nga makulban og kaldero kay ilaha man kining giisip nga kompetensya sa ilang negosyo.
Inay unta nga mokisikisi dayon, mas maayo pang mosugyot sila og alternatibong solusyon sa problema ug tabangan pagsulbad ang kakuwang sa sakyanan sa publiko ug ingon man ang kakuwang sa mga dalan.