Personal g’yud nako nga nasaksihan diha nga ang karsada sa pipila ka bahin dinhi sa dakbayan sa Sugbo nahimo na nga sapa atol sa pagbunok sa kusog kaayo nga uwan kaniadto’ng Huwebes sa hapon.
Mga 15 minutos human mibunok ang uwan, mibiya dayon ko sa downtown area kay nahadlok ko nga ang giparkingan sa akong sakyanan malunopan.
Apan pag-abot nako sa D. Jakosalem ug eskena Bonifacio, lawom na kaayo ang tubig. Gisubay nako ang D. Jakosalem nga susama na sa sapa nga ang tubig nagbaha gikan sa Cogon-Ramos.
Gisubay nako ang D. Jakosalem apan pag-abot nako sa eskena Ranudo, nalantawan nako nga sa unahan dapit sa ganghaan sa Archbishop Palace, lawom na ang paglunop.
Miliko ko paingon sa Ranudo kay nahuna-huna nako nga ang dalan Ramos habog-habog man, apan nasugatan na usab nako nga ang dalan Ranudo mora na usab og sapa, kapin sa dangaw ang tubig diha sa karsada.
Mi-right turn ko sa dalan Ramos nga gisanapan na usab sa tubig. Mipaingon ko sa Fuente Osmeña ug napasiga ang akong mga mata kay ang karsada sa Fuente gisanapan na.
Mideritso ko sa Osmeña Boulevard paingon sa Kapitolyo ug diha na ko gibati og grabe nga kalisang kay nag-aginod ang dagan sa mga sakyanan, usahay mahunong kini og pipila ka minuto.
Gilantaw nako sa unahan, tungod nga bahin sa karaang City Library, mga duha ka dangaw ang gilawmon sa tubig-baha. Paglusot nako sa Escario, susama gihapon ang giladmon sa tubig.
Ambot og diin gikan ang tubig. Swerte kay wala nay tubig sa Escario nga atubangan sa Capitol Parish. Apan sa Gorordo Avenue dapit sa JY Square, pwerte’ng kusoga sa baha nga gikan sa Sitio Sun-ok, dapit sa Aderan Hotel.
Wala na ko mopaingon pa sa North Reclamation Area (NRA) kay ang kauban ko nga reporter nga si Chito Aragon, didto sa mao nga dapit ug mireport nga naglunop na ‘sab didto.
Ang mga kauban ko sa The Freeman mireport nako nga sa downtown area sa D. Jakosalem ug Manalili lawom na kaayo ang tubig. Akong informer, mireport ‘sab nga natanggong sila sa lawom kaayo nga lunop-baha didto sa A.S. Fortuna sa Mandaue.
Sa Banilad-Talamban Road gilunopan sab ug apil ang M. J. Cuenco Avenue, Bonifacio ug daghan pa nga lugar. Sa laktod, paettttt!!!.
Ambot, nahutdan na tingali og paagi ang mga opisyal sa kagamhanan pagsulbad niini’ng problema. Ang pagpataka og labay sa basura mao ba g’yuy hinungdan?