Ang tawo di managsama ang ilang situwasyon mahitungod sa pagtulog. Ang uban haskang nakapahimulos sa nindot kaayong pagkahinanok sa kagabhion. Nga inig mata nila sa sayong buntag, mora’g kondisyon ang lawas nga nakatigum og kusog nga may panghuyatid pa. Apan adunay uban, nga nakatulog man tuod apan mora sad wala’y kinatulgan. Unsaon di man mahinanok, mag-alindasay nga ingon sa gihasol ang tanlag nga nagsige’g piyong apan dili makatulog.
Niadtong nagkaproblema sa pagtulog, kun magkanunay nga wa kay tarung kinatulgan, malagmit mosugmat kanimo ang sakit nga insomnia. Pero ayaw pagpakawala sa paglaum nga maingon kana niana sa imong kahimtang tungod kay aduna pay paagi nga magsilbing giya nimo, aron ka gayud makatulog na.
Magbato’g regular nga eskedyul sa pagtulog. Huwata nga dukaon ka unya mopahimutang dayon sa kuwarto aron matulog na. Apan himoa nga permi ka nang matulog anang orasa hangtud nga maanad kang motultol sa eskedyul sa imong pagtulog nga di kana matugaw bisan pa’g may maglangas di ka ma-estorbo
Pahimusli nga makapahuway ka, una moabot ang oras sa pagtulog. Kun mahimo kaligo og init-init nga tubig kun komportable ka. Paminusi ang hayag sa suga. Maminaw sa mahawot nga musika. Ayaw pagtan-aw sa TV nga makapawagtang sa duka o mga balita nga makapaisa sa kaika’g mo. Unya hangtud nga milapas na ang duka nimo, dili kana nuon makatagpilaw.
Himoa ang dapit o ang lawak nga makaagni sa pagtulog mo. Kinahanglan medyo may pagkangitngit o nag-amag lang ang kahayag, aron dayon dali maluya ang mata nga kadukaon ug inanay makatulog. Songsungi (ear plug) ang dalunggan nga di ka ma-estorbo sa mga kasikas nga mopugwat sa imong paghinanok. Sa uban ganahan og bugnaw aron kuno mahinanok pag-ayo apan mag-agad kini kun unsay temperature nga ikaw komportable niini.
May sumpay pa kini, busa ayaw sipyata ang pagsunod sa lindog nato, alang sa uban pa nga angay natong buhaton, aron maseguro nga mamaayo ang dili matarung nga kinatulgan sa panahon nga moabot na ang oras nga gusto na kita mopahulay sa kagabhion.